МАХН-ын дарга Н.Энхбаярыг Клиникийн хоёрдугаар эмнэлэгт шилжүүлэхгүй байх журмыг Эрүүл мэндийн сайд хүчингүй болгож, Хууль зүйн сайдад хүргүүлснээр Х.Тэмүүжин сайд бүртгэн уг журам хүчингүй болсон билээ.
    МАХН-ын дарга Н.Энхбаярыг Клиникийн хоёрдугаар эмнэлэгт шилжүүлэхгүй байх журмыг Эрүүл мэндийн сайд хүчингүй болгож, Хууль зүйн сайдад хүргүүлснээр Х.Тэмүүжин сайд бүртгэн уг журам хүчингүй болсон билээ. Ингэснээр Н.Энхбаяр болон хүнд ялтнуудын хувьд эмнэлэгт хэвтэн эмчлүүлэх эрх нь нээгдэж байгаа юм байна. Тиймээс Н.Удвал сайд өчигдөр Н.Энхбаяр болон өөр хоёр ялтныг Клиникийн хоёрдугаар эмнэлэгт хэвтэн эмчлүүл гэсэн тушаал гаргажээ.

    Гэвч уг тушаалыг ШШГЕГ-ынхан хүлээн аваагүй байна. Учир нь Н.Удвал сайдын гаргасан тушаал нь зөвхөн нэг хүний эрх ашигт нийцсэн хэмээн үзжээ. Клиникийн хоёрдугаар эмнэлгийн дотоод журамд төрийн алба хаагч, төрийн өндөр албан тушаалтанг үзнэ хэмээн заасан байдаг. Энэ дагуу Н.Энхбаяр эмчилгээ хийлгэх боломжтой ч бусад ялтны хувьд боломжгүй аж. Тиймээс ШШГЕГ-аас Эрүүл мэндийн сайд Н.Удвалд зөвхөн хоёрдугаар эмнэлэг гэлтгүй, нэг, гурав гээд аль ч эмнэлэгт ялтан шилжүүлж эмчилгээ хийлгэх боломжтой болгож өгөөч хэмээн хүсчээ.

    Н.Удвал сайдаас хариу ирсэний дараа Н.Энхбаярыг шилжүүлэх эсэхийг хэлэлцэх юм байна. Мөн ялтнуудыг өөр эмнэлэгт шилжүүлэх боломжтой болвол ШШГЕГ-аас тус эмнэлэгт ялтанг эмчлүүлэх өрөө тасалгааг тохижуулах аж. Учир нь ялтнууд энгийн иргэдтэй нэг өрөөнд хэвтэх боломжгүй учраас тусдаа өрөө гарган, бэлдэх юм байна.

    Түүнчлэн зарим хэвлэлийн хэрэгслээр Н.Энхбаярыг өнөөдөр хоёрдугаар эмнэлэгт шилжүүлнэ хэмээн цацагдаад буй. Гэвч энэ талаар МАХН, ШШГЕГ, Нийслэлийн прокурорын газраас тодруулахад, “Тийм зүйл байхгүй” гэлээ.

    Юутай ч МАХН-ын дарга Н.Энхбаярыг яаралтай Клиникийн хоёрдугаар эмнэлэгт шилжүүл хэмээн 41 ээж нойтон өлсгөлөн зарлаад буй. Мөн ЭМЯ-наас томилогдсон эмч нарын бүрэлдэхүүн Н.Энхбаярт үзлэг шинжилгээ хийж, яаралтай Клиникийн хоёрдугаар эмнэлэгт шилжүүл гэсэн шийдвэр гаргасан билээ.

    Хэдийгээр Н.Энхбаярыг эмнэлэгт шилжүүлэхгүй гэсэн журам хүчингүй болсон ч Н.Удвал сайдын өчигдөр гаргасан тушаал зөвхөн Н.Энхбаярт зориулагдсан учир ШШГЕГ-аас Н.Энхбаяр гэлтгүй бүх ялтны эрхийг зөрчихгүй байх тушаал, журам гаргахыг хүсээд байгаа юм байна.
Одоогоор Н.Энхбаяр ШШГЕГ-ын харьяа хорих 441 дүгээр ангид хоригдож байна.