Ерөнхий сайд Н.Алтанхуяг өнөөдөр УИХ-ын чуулганд цаг үеийн асуудлаар мэдээлэл хийж байна. Энэ үеэр УИХ-ын гишүүд  "Чингис хаан" бондыг хэрхэн зарцуулах гэж байгаа талаар асуулаа.

 Үүнд Ерөнхий сайд Н.Алтанхуяг "Бид Бондын зөвлөл гэж байгуулсан. 40, 50 төсөл ирснийг бид хянаж, хэлэлцээд 19 төсөл үлдсэн. Түүнийгээ одоо нэг бүрчлэн ярьж байна. Хамгийн сүүлд үлдсэн төслөө бид Засгийн газрын хуралдаанаар ярина. Дараа нь хэрэгжүүлэх төслөө УИХ-ын даргад цаасаар хүргүүлж, гишүүдэд танилцуулна. Бондын мөнгөөр Засгийн газрын хэрэгжүүлэх төслийг олон нийтэд ил тод танилцуулна" гэлээ.

  Харин Эдийн засаг хөгжлийн яамны сайд Н.Батбаяр "Бондын хувьд өнөөдөр шууд үр дүн нь зах зээл дээр гараагүй байгаа ч шууд бус хэлбэрээр нөлөөлж байгаа. Бондын мөнгийг дэд бүтцийн салбар руугаа оруулна. Зөвхөн зам биш гудамжаар нь ярих хэрэгтэй байна. Нэг нь ногоон байгууламж барьж байхад нөгөөх нь зам тавьж байна гэээд сүйтгэдэг асуудал бий. Үүнийг цогцоор нь шийдэх хэрэгтэй. УИХ-ын гишүүд бондын зарцуулалтанд хяналт тавих эрх нь бүрэн нээлттэй байгаа" гэв. Тэрбээр "Чингис хаан" бондыг зарцуулах болон бусад сонирхсон асуудалд МАН-ын бүлгийн хурал дээр мэдээлэл өгөхөд бэлэн байгаагаа илэрхийлсэн юм.

   Мөн Сангийн сайд Ч.Улаан "Механикаар эдийн засгийн өсөлт удааширч байгаа мэт харагдаж байгаа ч чанарын хувьд тийм биш. 2012 оны уул уурхайн салбараас орж ирэх мөнгөний төсөл биелээгүй ч эдийн засгийн бүтцийн хувьд өөрчлөлт гарсан байна. Бизнесийн салбарыг татварын салбараар дэмжих нь зүйтэй гэж Засгийн газар 2 шинэ төсөл дээр ажиллаж байна. Бид эдийн засгийн тогтовортой байдал, жижиг дунд үйлдвэрийг дэмжих, татварын ачаалын ихэнхийг уул уурхайн салбарт оноох зэрэг бодлогоор ажиллаж байна" гэв. Ерөнхий сайдын мэдээлэл үргэлжилж байна.