Өнөөдрийн Засгийн газрын хуралдаанд Ерөнхийлөгч Ц.Элбэгдорж оролцож байгаа. Нийслэлийн засаг дарга Э.Бат-үүл "Агаарын бохирдлоос гадна хөрсний бохирдол гамшгийн хэмжээнд хүрээд байна. Энэ 180 мянган гэр хорооллын айл бүгд гаднаа жорлонтой. Түүнийх нь бохир хуримтлагдсаар байгаад Улаанбаатарын хөрсөнд давхарга үүсгэчихээд байна. Одоо хүйтний улиралд гайгүй байгаа ч дулаан цаг ирэхээр хижиг, тахал зэрэг хэдэн зууны өмнөх аюултай өвчин газар авахыг үгүйсгэхгүй" гэлээ. Үүнд Ерөнхийлөгч анхаарлаа хандуулж "Бид гэр хорооллын бохирын асуудлаа хлормин зэрэг химийн асуудлаар шийддэг. Одоо найман худаг хаагдчихаад байна. Гэр хороололд шинээр баригдаж байгаа барилгуудыг хаанаас усаар хангах вэ? 100 метрийн гүнд бохирдсныг яаж шийдэх вэ? гэж асуув. Үүнд хотын дарга Э.Бат-Үүл "Ариутгах, цэвэрлэх байгууламжтай болгох хэрэгтэй. Одоо Хуучин найман худагт акт бичсэн ч хоёр шинэ худаг гаргахаар Солнгос, Японы байгууллагуудтай ажиллаж байгаа. Хөрсний бохирдлоос яаж хамгаалах вэ гэдэг үнэхээр хүнд.  Жорлонгын ханыг битүү хамгаалалтанд авах хэрэгтэй юм билээ. Мөн шинээр бохирдуулахгүй байх л хэрэгтэй байна. Саяхан төв цэвэрлэх байгууламжаа засварласан ч хүчин чадал нь хүрэхгүй байна. Нисэх, яармагт цэвэрлэх байгууламж шинээр барих гэж хичээж байна. Мөн Азийн хөгжлийн банк гэр хороололд хэсэгчилсэн цэвэрлэх байгууламж барих талаар судалж байгаа" гэсэн юм.

  Ерөнхийлөгч Ц.Элбэгдорж "Хөдөөн, орон нутгийн иргэд Улаанбаатар хотыг битгий зүглээч ээ. Агаарын бохирдсон, уух ус нь хортой байна. Засгийн газар харин орон нутагт амьдрах боломжийг нь бүрдүүлэхээр ажиллах ёстой. Нийслэл нь утаатай байна гэдэг хөгжил муу байна гэсэн үг" гэв.