Ерөнхийлөгч Ц.Элбэгдорж оролцсон Засгийн газрын хуралдаан өндөрлөлөө. Агаарын бохирдлыг бууруулахад ямар асуудал тулгараад байгаа талаар хэлэлцсэн хурлын төгсгөлд Ерөнхийлөгч Ц.Элбэгдорж ажлаа хангалтгүй хийж байна гэж Засгийн сайд нарыг "бангадав". Тэрбээр асуудал явж, явж эрх мэдэл, эд мөнгөний төвлөрлийн асуудал болоод байна. Үүнийг сааруулах асуудлаа барьж авъя. Том асуудлыг тойрохгүй, голоос нь барьж авдаг, цагаа төвлөрүүлдэг байх хэрэгтэй. Та бүхэнд ажил хийх бүрэн эрхийн дөрөвхөн жил байхад сайтын сэтгэгдэл зэрэг жижиг зүйлтэй зууралдах хэрэггүй. Ч.Сайханбилэг сайд аа, нэг хүнийг гүтгэлээ гэж байгаа бол сая хүний асуудлыг яах вэ? Сая хүний асуудал байхад хэсэг хүнийг доромжлохыг битгий тоо. Веб сайтаар хамгийн их муулуулдаг хүний нэг нь би. Үүнийг сайтуудын холбоонд нь орхиод өөр чухал ажлаа хий л дээ. Ямар завтай юм бэ?" гэв. Мөн нийслэлийн засаг дарга Э.Бат-Үүлд хандаж "Юун тэр буруу рультэй машин бэ? Иргэдээс нэг удаа асуугаад 75 хувь нь үгүй гэсэн байхад яагаад дахин дахин асуугаад байгаа юм? Хилийн гадаа байгаа машины тухай ярихаас ороод ирсэн машиныг хязгаарлах хэрэггүй. Хүний эрхийг засварлах эрх та нарт байхгүй. Дарга нараас өмнө хүний эрх гэж байсан юм" гэв.

   Харин Уул уурхайн сайд Д.Ганхуягт хандаж "Төмөр зам баригдаагүй хариуцлагыг та өөрөө хариуцна шүү. 2013 он гэхэд шинэ төмөр замыг хүлээж авна гэж байгаа. Төмөр зам барих ажил улс төр, албан тушаалтны шийдвэрээс хамаараад байгаа бол УИХ дээр ярилцъя. Улаанбаатарт ашигт малтмал байхүй мөртлөө ашигт малтмалын талаар хамгийн их ярьдаг нь болоод байна. Хотод Налайхын уурхайгаас өөр юм байхгүй. Тиймээс хөдөөгийн хөгжлийг хөдөөдөө ярих хэрэгтэй.  Шадар сайд Д.Тэрбишдагва "Ард түмэн хаан" гэж сайхан үг хэлсэн. Гэтэл тэр хаад чинь утаанд угаартаж унаад байна. Утаа ганцхан Улаанбаатарт биш Дархан, Эрдэнэт, аймгийн төвүүдэд байгаа. Тавдугаар цахилгаан станц барих асуудал олон жил болж байгаа шүү. Оросоос авдаг эрчим хүчний импорт нэмэгдээд байгаа. Монгол өнөөдөр эрчим хүчний диваажин биш гуйлгачин болсон байна. Монголд нэг газар юм хийх гэхээр хийхгүй гэдэг синдром байна. Тиймээс асуудал хариуцсан албан тушаалтанд хариуцлага тооцдог байх хэрэгтэй" гэв.

Т.Гэрэл