Хууль зүйн сайд Х.Тэмүүжин ойрын үед айлын эхнэрүүдээс заналхийлж, сүрдүүлсэн захидал авдаг болоод байна. ШШГЕГ-ын дарга байсан М.Ганхүүгийн эхнэр, УИХ-ын Тамгын газрын ажилтан Н.Нарантуяа хүүгийнх нь ажлыг өөрчилж, нөхрийг нь халах гэж буйг мэдээд сүрдүүлсэн захидал илгээснийг сайд олонд дэлгэсэн билээ. Н.Нарантуяад заналхийлсэн, айлган сүрдүүлсэн хэргээр эрүүгийн хэрэг үүсгэн шалгаж байна. Тэгвэл өнгөрсөн долоо хоногт түүнд үр хүүхдэд чинь үйлийн үр чинь тусна гэх утгатай сүрдүүлсэн шинжтэй мессеж ирсэн, түүний эзэн нь МАХН-ын дарга Н.Энхбаярын эхнэр О.Цолмон байсан гэдгийг цагдаагийн тусламжгүй дугаараар нь таниад олчихсон. Тэрбээр "Бурхан бүх­нийг харж байгаа. Чи энэ албан тушаалд хэдэн монголын эр­чүүд, эмэгтэйчүүдийг устгах гэж муу ёрлож гарч ирэв ээ. Чиний хүүхэд болж төрсөн танай хүүхдүүдийг би өрөвдөж байна. Чи Монголд хар нэртэй үлдэх хүн байна даа” гэх зэргээр олон мессеж илгээжээ. Тэгвэл хуулийнхан ийм мессеж явуулсан О.Цолмонд ч бас эрүүгийн хэрэг үүсгэхээр ярьж эхлээд байгаа тухай эх сурвалж мэдээллээ. Учир нь И.Нарантуяа, О.Цолмон гэх энэ хоёр эмэгтэй хоёул адилхан Х.Тэмүүжинг заналхийлсэн. Тийм байхад И.Нарантуяад эрүүгийн хэрэг үүсгэж, ажлаас нь гаргачихаад О.Цолмонг зүгээр үлдээх нь шударга ёсонд нийцэхгүй гэж ярьж эхэлжээ. ШШГЕГ-ын дарга байсан М.Ганхүүгийн эхнэр шиг хорьж, цагддаггүй юмаа гэхэд ядаж л шалгах ёстой гэсэн байна. Ер нь ч О.Цолмон их ширүүн үгтэй хүн. "Нөхрийнхөө төлөө жил орчим дуугарлаа. Энэ хооронд хэд, хэдэн хүнийг нөхрийг нь хэлмэгдүүлсэн гэж нэрийг нь дурдаад авсан. Бас бус хүмүүсийн нэрийг дуудаж бухимдлаа илэрхийлж л байсан. Гэхдээ юманд хязгаар гэж байдаг даа. Үр хүүхэд рүү нь давшилж, сүсэгтэй хүнд бол сэжиг төрмөөр тийм үгтэй мессеж илгээсэн байх юм. Энэ тухайд "Хүнийг хэл, амаар доромжилно гэдэг хуулийн хариуцлагатай. Харин О.Цолмон үүнээс давж, юу ч хэлж, ярьж болоод байна шүү" гэх нь байна.

  Гэтэл Х.Тэмүүжин сайд энэ саналыг нь дэмжихгүй байгаа аж. Тэрбээр И.Нарантуяаг шалгуулсан ч хуулийн хариуцлага хүлээлгэхээс татгалзсан бол одоо тэргүүн хатагтай асан О.Цолмонд өршөөнгүй сэтгэлээр хандаж байгаа бололтой. Нэрээ, утсаа нууцлаагүй, хувь хүний хоорондын асуудал гээд хэрэгсэхгүй орхих бодолтой байгаа аж. Магадгүй Н.Энхбаяртай өчнөөн асуудалтай байхад эхнэрийг нь нэмээд яахав гэж бодсон ч байж магад.  Харин түүний доод албан тушаалтнууд, мөн зарим гишүүд хууль адил, тэгш үйлчлэх ёстой учир Н.Энхбаярын эхнэр ямар нэгэн хариуцлага хүлээх ёстой гэж ятгаж байгаа аж.