Увс аймгаас Улсын Их Хуралд сонгогдсон манай намын гишүүн Б.Чойжилсүрэн, Ч.Хүрэлбаатар нарыг Захиргааны хэргийн давж заалдах шатны шүүхээс хууль зөрчсөн хэмээх “хууль бус” шийдвэр гаргалаа.
   Яльгүй цөөн тоогоор парламентэд олонх болсон Ардчилсан нам шүүх, прокурор, хууль хяналтын байгууллагууд төрийн машинаар ард түмний сонголтыг заазуурдаж байгаа олон тохиолдлын зөвхөн нэг нь энэ юм.  
 
   Сонгуулийн тойргийн хороо бүрэн эрхийнхээ дагуу шийдвэрээ гарган Сонгуулийн ерөнхий хороо батламжилж, Монгол Улсын Ерөнхийлөгчид өргөн барьж тангараг өргөсөн Улсын Их Хурлын гишүүдийг ямар ч аргаар хамаагүй төрд шургалах гэсэн атгаг санаатнуудын явуулгаар худлыг үнэн, хуулийг гууль болгож, төрийн эрх мэдлийн давуу талаа ашиглан эргүүлэн татахаар санаархаж байгаа нь Монгол төрийн дархлаа суларч, хууль цааз, төрийн хүчийг хэний ч эсрэг, яаж ч ашиглаж болохоор болсон аюултай цаг үе иржээ гэсэн айдас хүйдсийг олон түмэнд төрүүлж байна.
 
   Монгол Ардын Нам, нэр дэвшигчдийн зүгээс гаргасан ямар ч гомдол саналыг үл тоон бидний эсрэг зохиомол гомдол гарган түүнийг нь аль ч хамаагүй шүүхэд, хэн дуртай шүүгч нь буруу зөрүү хууль хэрэглэн зөвхөн нэг талыг барьж, хууль бус шийдвэр гаргаж байгаа нь ард түмний сонголтыг шүүх хуулийн байгууллагын оролцоотойгоор засварлан өөрсдийн ноёрхлыг тогтоон сонгуулийг үнэгүйдүүлж, төрийн тогтолцоог гажуудуулах санаархал гэж дүгнэж байна.
 
  Монгол Улсад хууль дүрэм мөрдөгдөж, ардчилал, сонгуулийн зарчим, хүний сонгох сонгогдох эрх чөлөө хэрхэн хэрэгжиж байгаа, түүнд хяналт тавих төрийн дээд байгууллагууд, төрийн тэргүүн ямар дүгнэлт хийж байгаагаа ард түмэнд  сонсгох цаг нь болоод байна.
Ард түмний сонгосон сонголтыг санал тоолох машинаар луйвардах, автомат машины дүгнэлтийг хянах асуудлыг зохион байгуулалттайгаар зогсоож, хяналтын тооллого хийлгэх саналыг зориудаар хүлээж авахгүй байгаа явдал, хууль шүүхийн шийдвэрээр өргөн олны саналыг засварлаж тохуурхаж байгаа нь дан ганц Монгол Ардын Намын асуудал биш нийт сонгогчдийн, нийгмийн санаа зовоосон асуудал болон хувирч, олон түмний бухимдлыг төрүүлж байна.
 
  Луйвар, булхайн аргаар олонхи болон ноёрхлоо тогтоож, Монголын нийгэмд дураараа авирлах дур сонирхол, атгаг санаархалаа зогсоохыг Ардчилсан намаас шаардаж байна.
Увс аймгийн сонгуулийн 15 дугаар тойрогт нэр дэвшин ялалт байгуулж, тангарагаа өргөсөн Улсын Их Хурлын гишүүн Б.Чойжилсүрэн, Ч.Хүрэлбаатар нарыг хуулиар далайлган хэлмэгдүүлэх ажиллагаагаа зогсоохыг шаардаж байна.