Цагаатгах ажлыг удирдан зохион байгуулах аймаг, нийслэлийн салбар комисс өнгөрсөн оны 4-р улиралд цагаатгалын хуулийг хэрэгжүүлэх, хэрэгжилтэд хяналт тавих, иргэдийн өргөдөл гомдол, санал хүсэлтийг шуурхай шийдвэрлэх, тэдэнд эрх зүйн зөвлөгөө өгөх зэрэг асуудалд анхаарал хандуулж ажиллажээ.Энэ хугацаанд хэлмэгдсэн иргэд, тэдний төрөл төрөгсөд болох 111 хүнд 3 сая 810 мянган төгрөгийн нэг удаагийн буцалтгүй мөнгөн тэтгэмж, 99 хүнд 1 сая гаруй төгрөгийн эд бараа, хүнсний зүйлийн дэмжлэг үзүүлсэн байна. Мөн 14 хүнд 14 сая төгрөгийн нөхөх олговрыг олгуулжээ.
Түүнчлэн Тагнуулын Ерөнхий Газрын архив бүртгэлийн хэлтсээс хэлмэгдээд цагаатгагдсан иргэдийн архивын лавлагаа, цагаатгасан шийдвэрийн хуулбарын хамт 35, Үндэсний төв архиваас хүн амын бүртгэлийн тооллогын лавлагаа 14 ширхэгийг тус тус захиалан авч нэхэмжилсэн иргэдэд олгосон байна.
Салбар комиссууд улс төрийн хилс хэргээр баривчлагдсан, мөрдөгдсөн, шийтгүүлсэн гэх боловч эргэж ирээгүй, хэрэг материал нь олдохгүй, сураггүй болсон иргэдийн асуудлыг шуурхай шалгаж шийдвэрлэх, амьдрал хүнд, нэн ядуу, тэтгэвэр багатай хэлмэгдэгсдийн үр хүүхдэд нийгмийн халамж үйлчилгээ үзүүлэх, орон сууцны нөхцлийг сайжруулах, салбар комиссын төсөвт сургалт, сурталчилгааны зардлыг тусгах зэрэг санал хүсэлтийг Улсын Комисст хандаж тавьсан байна гэж Цагаатгах ажлыг удирдан зохион байгуулах улсын Комиссын хэвлэл, мэдээллийн албанаас мэдээлэв.
