Чингэлтэй дүүргийн прокурорын газраас өнгөрсөн оны арванхоёрдугаар сарын эхээр Нийслэлийн цагдаагийн газрын Албадан саатуулах, баривчлах төвийн ахуй нөхцөл нь хуулиар тогтоосон стандарт шаардлагыг хэрхэн хангаж байгаад шалгалт хийжээ. Шалгалтаар тус төвийн баривчлах байрны ахуй нөхцөл туйлын хангалтгүй, хүн бүр ор, хучлага, дэвсгэрээр хангагдаагүй, одоогийн ашиглаж буй цөөн тооны орны зарим нь эвдэрч дахин ашиглах боломжгүй болсон, баривчлах байранд байрлаж буй хүмүүсийн 60-70 орчим хувь нь цементэн шалан дээр хэвтдэг, хоёр хүн дундаа нэг хучлагатай, мөн агааржуулалт, гэрэлтүүлэг нь хангалтгүй байсан зэрэг зөрчил, дутагдал гарсан байна. Тиймээс уг зөрчлийг дүүргийн прокурорын шаардлага хүргүүлсэн аж.Албадан саатуулах, баривчлах төвийн удирдлага дээрх шаардлагын дагуу баривчлах шийтгэл эдлэгчдийн ахуй нөхцлийг сайжруулах талаар зохион байгуулалтын арга хэмжээ авахаар холбогдох байгууллагад асуудал тавьж, шийдвэрлүүлсэн талаар хариу ирүүлсэн байна.
Энэхүү шаардлагын биелэлтийг тус дүүргийн прокурорын газраас 2013 оны нэгдүгээр сарын 11-ний өдөр очиж танилцахад тус төвийн захиргаа БНХАУ-аас 125 хос буюу 250 төмөр орыг төмөр замаар тээвэрлэн авчирч, тус төвд буулган баривчлах байрны хуучин орнуудыг бүгдийг гаргаж, шинээр авчирсан орнуудыг угсарч байгаатай тааралдаж, шаардлагын биелэлттэй танилцав.
Албадан саатуулах баривчлах төв тус дүүргийн прокурорын шаардлагын дагуу Нийслэлийн цагдаагийн газарт хүсэлт тавьж, шуурхай арга хэмжээ авч 25,0 сая төгрөгийн хөрөнгө гаргуулж, дээрх 250 ширхэг орыг хятад улс руу биет төлөөлөгч явуулж авчруулсанаар хүн бүр ороор хангагдаж ахуй нөхцөл нь дээшилж, прокурорын шаардлагын заалт хэрэгжсэн байна.
Тус дүүргийн прокурорын газар сүүлийн хоёр жилд энэ төвийн баривчлах байрны ахуй нөхцлийг сайжруулах талаар Нийслэлийн мэргэжлийн хяналтын газартай хамтран удаа дараа шалгалт хийж, 2011 оны гуравдугаар сараас хойш Цагдаагийн Ерөнхий газар, Нийслэлийн цагдаагийн газар, Албадан саатуулах баривчлах төвийн удирдлагад нийтдээ арав шахам шаардлага хүргүүлээд байсан юм.
Б.Чимэг
