“Аса цирк”-д цагаан сарыг угтан ээлжит үзэсгэлэн худалдаагаа зарлажээ. Цагаан сараар ирсэн зочиддоо Монгол үйлдвэрийнхээ бэлгийг өгөх, сар шинийн ширээгээ чимэглэх идээ цагаагаа авахаар цугласан хүмүүс олон байсан юм.
 Нэг ёсондоо бэлгээ ч авна, боов, чихрээ ч бэлдэнэ гэсэн бодолтой хүмүүс үзэсгэлэн худалдааг зорьдог. Тэгвэл “Аса цирк”-д гарч байгаа үзэсгэлэн худалдаа зөвхөн цагаан идээ, хэвийн боов, еэвэнгээс хэтэрсэнгүй. Тиймээс  зочиддоо бэлэг авахыг хүссэн ахмадууд гар хоосон буцаж байв. Бэлэг гэвэл ганц, хоёрхон ноолууран оймс, гэдэс цэвэрлэх цай, хүүхэд багачуудад өгч болох набор, чихрийн цуглуулгаас өөр юм дэлгэсэн лангуу байсангүй. Харин хэвийн боов, тавгийн чихэр, цагаан идээ, лаазалсан загас гээд л үзэсгэлэн худалдаанд дэлгэгддэг  бүх л зүйл байв. Гэхдээ ууц, хонины мах бас л байсангүй.
“Өгөөж”, “Атар өргөө”, “Суман гүн”, “Мөнх-Ундрам”, "Аварга" зэрэг компаниудын хэвийн боов, еэвэнгүүд худалдаалагдаж байна.  Хэвийн боовны хувьд 1500-2400 төгрөгний үнэтэй, еэвэн жижиг томоосоо хамаараад янз бүрийн үнэтэй худалдаалагдаж байв. Хамгийн үнэтэй суурь еэвэн л гэхэд “Суман гүн” компаний өлзий суурь еэвэн байсан ба энэ нь 18000 төгрөгний үнэтэй байлаа.
Мөн нэрс, үхрийн нүд гээд л жимсний чанамалууд 4000-6000 мянган төгрөгний үнэтэй борлуулагдаж байна.
Адууны жигнэсэн мах, Хөвсгөлийн цагаан загасны хувьд 2500-4000 төгрөг,  даршилсан лууван 1000 төгрөг, Дунайский салат 1900, шилтэй өгөрций  1950-4100, төрөл бүрийн компотнууд  1600-4000 төгрөгний хооронд байлаа.
Үзэсгэлэн худалдаанд цагаан идээ, утсан загас, чацаргана, зөгийн балтай лангуу олон байлаа. Томоохон үйлдвэрлэгчид төдийгүй жижиг, дунд үйлдвэрлэл эрхэлдэг хүмүүс үзэсгэлэн худалдаанд оролцож байв. Цагаан идээний дундаж үнэ 2000-1500 мянгын хооронд хэлбэлзэж байлаа.
Хорхой ааруул  3100-8000 төгрөг, хурууд 10000, сүүн хурууд 15000 мянгаар худалдаалагдаж байв. Үүнээс хүний нүдэнд тусч байсан нэг зүйл байсан нь өнгөт ааруул юм. Өнгөт ааруулны нь хувьд  500 грамм нь 10000 төгрөгний үнэтэй байлаа.
Мөн литрийн сүү, тараг, айраг гэхээсээ илүү савласан хайрцагтай сүү, таргууд их байлаа.  Үүнд, “Аварга чанар” сүү 1400 төгрөг,  “Милко” 1450 төгрөг,  “Cool” жүүс 1600 гэх мэт  үнэтэй байв.
Харин цагаан будаа 1 кг нь 2000, 5 кг нь 9800 төгрөг, төмс 1кг 600 төгрөгөөр худалдаалагдана.