УИХ-ын Номын сангийн уншигчдад зориулан УИХ-ын гишүүн, Соёл, спорт, аялал жуулчлалын сайд Ц.Оюунгэрэл өөрийн зохиол, бүтээлүүдээсээ хандивлаж буйгаа хэлж, УИХ-ын Тамгын газрын Ерөнхий нарийн бичгийн дарга Б.Болдбаатарт номуудаа гардууллаа.
Эрхэм гишүүний бичсэн “Ногоон нүдэн лам” номыг Монголын нийт уншигчид андахгүй сайн мэдэхийн сацуу энэхүү бүтээл нь номын дэлгүүрүүдийн борлуулалтад байнга дээгүүр жагсдагийг андахгүй.
УИХ-ын гишүүн, сайд Ц.Оюунгэрэл “Ногоон нүдэн лам” номоосоо гадна “Гэрт болсон яриа”, “Миний ажлын ноу хау”, “Америкт суралцсан тэмдэглэл”, “Миний лобби” зэрэг номоо ч мөн УИХ-ын номын санд бэлэглэж байгаа аж.
УИХ-ын үе үеийн гишүүд, зохиолч, уран бүтээлчид, эрдэмтэн судлаачид ийнхүү өөрийн бүтээл, ном бүтээлээсээ УИХ-ын номын санд бэлэглэж, хандивлах нь уламжлал болсон бөгөөд үүний өмнө УИХ-ын дарга асан Д.Дэмбэрэл, Д.Лүндээжанцан нарын олон гишүүд бичсэн ном, туурвилаасаа хандивлаж, уншигчдын оюуны мэлмийд толилуулахаар өргөн барьж байсан билээ. УИХ-ын гишүүн С.Дэмбэрэл ч тус номын санд нэлээд чухал нэгэн буланг тусгайлан тохижуулж өгч байсан аж.
УИХ-ын номын сангийн үйл ажиллагаа зөвхөн Төрийн ордныхонд үйлчлэхээр хязгаарлагддаггүй, номын санд орж ирсэн хэн бүхэнд нээлттэй байдаг тухай УИХ-ын Тамгын газрын Ерөнхий нарийн бичгийн дарга дурдаад, цаашид олон нийтэд улам илүү нээлттэй болгох зорилготой буйгаа энэ үеэр онцолсон юм гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
Сэтгэгдэл (2)