Дуурь бүжгийн эрдмийн театрын уран бүтээлчид энэ сарын 27-ны 17 цагт Дж.Пуччинигийн ТОСКА дуурийг тоглох гэж байна. Гурван бүлэг, гурван үзэгдэлт тус дуурийн цомнолыг Ж.Жакоза, Л.Иллика нар зохиож, анх 1900 оны нэгдүгээр сарын 14-нд Ром хотын “Костанци” театр тогложээ. Ж.Пуччини тухайн үед В.Сардугийн “Флория Тоска” жүжгийг үзээд сэтгэл нь маш их хөдөлж, уг дуурийг бүтээсэн гэдэг.

Энэхүү дуурь Ж.Пуччинийн хамгийн хүнд драмтай дууриудын нэг бөгөөд авьяаслаг, үзэсгэлэнтэй хэдий ч сэтгэлийн хөдөлгөөн, хар ихтэй, гэнэн бүсгүй Тоска, мөрөөдөмтгий, мэдрэмтгий, шулуун шударга Каварадосси, санаа муутай, харгис Скарпья нарын дүрийг хөгжмийн аялгуугаар маш тодорхой гаргаж өгсөн нь сонсогч, үзэгчдийн сэтгэлийг ихэд татдаг байна. Ирэх амралтын өдөр тоглогдох уг дуурийн найруулагчаар УГЗ, Л.Эрдэнбулган ажиллаж, УГЗ, Ж.Бүрэнбэх удирдаачаар ажиллах юм байна. Харин гол дүрд СТА Б.Эрдэнэтуяа тоглох юм байна.

Үйл явдлыг хураангуйлан хүргэвэл Ром хотын төв дэх нэгэн сүмд зураач Каварадосси өөрийн зурсан Магдалена эх дагинын хөргийг харж, хайрт бүсгүй Тоскатайгаа зүйрлүүлэн бодлогоширно.

Римийн эрх чөлөөний төлөө тэмцсэний улмаас шоронд хоригдож байгаад оргож гарсан Чезаре Анжелотти энэ сүмд нуугдсан байжээ. Каварадосси Анжелоттитай уулзаж түүнд туслахад бэлэн байгаагаа хэлнэ. Гэтэл алсад их бууны дуу нүргэлж, хоригдол оргосныг зарлана.

Каварадосси, Анжелотти хоёр яаравчлан гарах гэтэл хаалга тогшиж, Тоска орж ирнэ.

Тоска Каварадоссийн зурсан хөргийг харангуут сурвалжит бүсгүй Аттавантитай төстэй болохыг ажиж хардах сэтгэл төрнө. Каварадосси сэтгэлт бүсгүйгээ тайтгаруулан зөвхөн түүнд хайр сэтгэлтэйгээ батална.

Тоска тайвширч,орой учрах цагаа болзоод гарч явна. Зураач Анжелоттийг дагуулан гарна. Энэ үед Скарпъя дагуулынхаа хамт сүмд дайран орж ирээд Аттавантийн овгийн сүлд бүхий дэвүүрийг олно. Мөн эх дагина Магдалена, Аттавантитай төстэй болохыг ажина. Аттаванти бол Чезаре Анжелоттийн төрсөн дүү бөгөөд түүнийг оргоход гол үүрэг гүйцэтгэжээ.

Үүнээс үндэслэн Скарпъяд Каварадосси Анжелотитой холбоотой байж болзошгүй гэсэн хардлага төрнө.

Скарпъягийн ажлын өрөө. Цагдаа нар Каварадоссийг баривчилж авчран, тамлах авч Анжелоттийг үл илчилнэ. Тоска тамлалыг харж тэсвэр алдан Анжелоттийн нуугдсан газрыг зааж өгөв. Зураачид цаазын ял тулгажээ. Тоска Каварадоссийн амийг аврахыг Скарпъягаас гуйхад, тэрээр өөрийн эртний хүслийг биелүүлэхээр шийдэж Каварадоссийн амийг аварсны хариуд Тоскагийн бие, сэтгэлийг шаардана.

Тоскад энэ доромжлол үнэхээр хүнд байвч өнгөн дээрээ зөвшөөрнө.

Скарпъя зураачийг хуурамчаар буудах тушаал өгч, Тоскад Каварадоссийн хамт Римээс чөлөөтэй гарч явах бичиг олгоно. Скарпъя Тоскаг тэврэн таалах гэтэл ширээн дээр байсан хутгыг авч амжсан Тоска хорон санаатын амийг хөнөөнө.

Шоронгийн өрөө. Каварадоссд амьд байх бага хугацаа үлджээ. Тэр Тоскадаа захидал бичиж сэтгэлдээ салах ёс гүйцэтгэнэ. Гэнэт Тоска орж ирэв. Скарпъягийн алагдсан тухай, оргох боломж олдсон тухай Тоскагийн яриаг Каварадосси сэтгэл догдлон сонсоно.

Хуурамчаар буудах үед нь болгоомжтой унаж, хөдлөхгүй хэвтэхийг Тоска хайрт хүндээ сануулна.

Харуулынхан ирж Каварадоссийг авч явна. Буун дуу пижигнэнэ. Тоска хайрт дээрээ хурдан очиж уулзахыг яарна. Харуулын цэргүүдийн хөлийн чимээ тасрахад Тоска гүйсээр хүрч очив.

Гэтэл... Тоска Скарпъяд хэрхэн мэхлэгдсэнээ сая ойлгов. Хайрт хүнээ цаазлуулсан Тоска цамхагийн тавцангаас үсэрч амиа егүүтгэнэ.