Хууль зүйн дэд сайд Э.Эрдэнэжамьяан албан тушаал, эрх мэдлээ ашиглан мөрдөн байцаалтын ажиллагаанд саад учруулсан хэрэгт сэжигтнээр тооцогдон АТГ-т шалгагдаж байгаа. Учир нь тэрээр гурван шатны шүүхээс хорих ял сонссон МАХН-ын дарга Н.Энхбаярын хэрэгт холбогдон Интерполоор эрэн сурвалжлагдаж буй Н.Энхбаярын төрсөн дүү Н.Энхтуяа, “Өргөө” зочид буудлын хувьчлалтай холбоотой Б.Хуяг нарыг интерполоор эрэн сурвалжлахаа зогсоож өгөөч гэсэн утгатай албан бичиг явуулсан юм. Уг хүсэлтийг дэд сайд гаргах ёсгүй тул Интерполын нарийн бичгийн даргын газраас энэ хэргийг лавлахаар Хууль зүйн яамд захидал илгээсэн нь түүнийг “барьж” өгсөн билээ. Тухайн үед түүнийг захидал явуулсаны дараахан Б.Хуяг, Н.Энхтуяа нарыг олон улсад эрэн сурвалжлах хуульд заасан үндэслэлд таарч байгаа эсэхийг дахин судалж, хариу ирүүлэх хүсэлт тус газрын ерөнхий нарийн бичгийн даргын газраас Интерполын Монголын товчоонд ирүүлсэн юм. Түүгээр зогсохгүй Б.Хуяг, Н.Энхтуяа нарын эрэн сурвалжлах ажиллагааг эргэж харахаар болсоноо ч мэдэгдсэн билээ. Тиймээс Э.Эрдэнэжамъяангийн уг үйлдлийг мөрдөн байцаах ажиллагаа, сэжигтэн, яллагдагчийг эрэн сурвалжлах ажлыг удаашрахад хүргэсэн хэмээн АТГ-аас шалгаж эхлээд байгаа юм.
Харин саяхнаас Б.Хуяг, Н.Энхтуяа нарыг Интерполоор эрэн сурвалжлахаа зогсоосноо мэдэгдсэн билээ.
АТГ-т шалгагдаж буй Хууль зүйн дэд сайд Э.Эрдэнэжамъяан АТГ-т ганцхан удаа мэдүүлэг өгсөн байдаг. Тэгэхдээ “Би Интерполын ерөнхий нарийн бичгийн даргын газрын албан ёсны цахим хуудас руу нь и-мэйл явуулсан нь үнэн. Хилсээр ял шийтгүүлсэн, улс төрийн хэрэгт холбогдсон хүний хэрэгт холбогдож буй сэжигтэн Монголын иргэдийг эрэн сурвалжилж байгаа нь Интерполын үндсэн хуулиа зөрчиж байгаа юм биш үү. Тиймээс энэ хоёр хүнийг эрэн сурвалжлахаа зогсоогооч гэдгийг л бичсэн” хэмээн мэдүүлсэн билээ.
Гэтэл албан тушаал эрх мэдлээ хэтрүүлэн ашиглах дуртай Хууль зүйн дэд сайд Э.Эрдэнэжамьяан дахин асуудалд оржээ. Тодруулбал, МАХН-ын дарга Н.Энхбаярыг хоёрдугаар эмнэлэгт шилжүүл гэсэн ч хүнд ялтанг эмнэлэгт шилжүүлдэггүй журмын дагуу шилжүүлэхээс татгалзаад байсан. Гэтэл Эрүүл мэндийн яамны сайд Н.Удвал дангаараа шийдвэр гаргаж журмыг хүчингүй болгосон билээ. Үүнийг Хууль зүйн сайд Х.Тэмүүжин “Танай даргыг хүлээн авах эмнэлэг байна. Харин эхний ээлжинд гарах шаардлагатай 20 хоригдлыг хүлээн авах эмнэлэг байхгүй байна. 20 хүн бол зөвхөн эхний ээлжийнх. Үүний цаана эмчлүүлэх шаардлагатай гэж 200 орчим хүн хүсэлтээ гаргасан. Тиймээс эдгээр хоригдлыг хүлээн авах эмнэлэгтэй холбоотой асуудлаа шийд, тэгвэл бид журмаа өөрчилж болно” гэж хэлсэн. Гэтэл энэ сарын 11-нд ганцаарчилж гаргасан шийдвэртээ дээр дурдсан журмыг хүчин болгосон байсан. Харамсалтай нь буруу заалтаа хүчингүй болгосноор хориглосноос бусдаар гарч эмчлүүлж байсан хоригдлууд маань эмнэлэггүй болох нөхцөл үүсчихээд байна. Эрх мэдлээ буруугаар ашиглаж, шахалт үзүүлэх журмаар ажиллаад байгаа юм” хэмээн тайлбарлаж байв.
Гэтэл Н.Удвал сайд дангаараа журам өөрчилсөний дараа Хууль зүйн дэд сайд Э.Эрдэнэжамъян Шүүхийн шийдвэр гүйцэтгэх газарт Н.Энхбаярыг эмнэлэгт шилжүүл гэсэн хууль бус тушаал явуулжээ.
Энэ талаар Хууль зүйн сайд Х.Тэмүүжин “Дэд сайдын олгогдоогүй эрх хэмжээг эдэлсэн” гэв.
Юутай ч Хууль зүйн дэд сайд Э.Эрдэнэжамьяан эрх мэдлээ хэтрүүлэн ашигласнаар дахин асуудал үүсгэсэн байна. Уг нь өөрөө хуульч хүн. Тийм байж, хуулиа, ажлаа мэддэггүй хүүхэд шиг байсхийгээд албан тушаал, эрх мэдлээ ашигласан хэрэгт орооцолдсоор.
Б.Золбоо
Сэтгэгдэл (39)