Ам барьдаг дуучдад баяртай гэж хэлэх цаг  хэзээ ирэх бол?. Ам барьнаа гэдэг шууд утгаараа  эргэн тойрныхныгоо хуурч, өөрийгөө ч доромжилж байгаа хэрэг шүү дээ. Хэд хэдэн дуу гаргаад л олонд танигдана. Төд удахгүй анхны бие даасан тоглолтоо хийнэ. Тоглолтон дээрээ ам бариад, фонограмм тавиад л. Хэрэглэгчдийн эрх ашгийг хамгийн ихээр зөрчиж, луйвардаж байгаа эл үйлдлийг шүүмжлэхгүй байхын аргагүй. Ам баригчид өөрсдийн ухамсар, хүмүүжлээрээ сонсогч, үзэгчдээ хуурахаа больчихвол хөгжихгүй биш хөгжөөд байгаа урлаг маань улам хүчирхэгжих нь ойлгомжтой. Оны өмнөхөн  “амаа хөдөлгөдөг” дуучдыг хамгийн ихээр шүүмжилдэг гитарчин Өөжгий тэдний тухай үзэл бодлоо илэрхийлээд амжсан. Бүр ам барьдаг дуучдын тоглолтыг ориг мөнгөөр бус канондсон мөнгөөр үзье гэж уриалсан. Ингэж уриалаад төд удалгүй зарим нэг зорилго нэгт уран бүтээлчидтэйгээ хамтарч “ам барьдаг” байдлыг ажил хэрэг болгож таслан зогсоохоор шийдвэрлэсэн гэдэг. Гитарчин Өөжгий  болон зарим уран бүтээлчид ШӨХТГ-тай хамтарч ганц дуу гаргачихаад тоглолт бүрт ам барьдаг явдлыг таслан зогсоох гэнэ. Энэхүү ажил биелэлээ олвол төд удахгүй  “амаа хөдөлгөдөг” одонцорууд Монголын урлагаас арчигдах биз. Уг нь дуулдаг хүмүүсийг л дуучин гэж нэрлэдэг баймаар юм. Мөнгөө төлж тоглолт үзэж байхад, ам барьж байвал чулуу шидээд хөөж буулгах ёстой гэж үзэж байгаа нэгэн байхад “өө яахав ихэнх дуучид л ам барьдаг” гэж өөхшүүлдэг хүмүүс бас цөөнгүй. Ямартай ч та бүхэнд ам барьдаг дуучдыг эсэргүүцдэг зарим нэг хүмүүсийн яриаг сонирхуулъя.

    Монголын реппер Gee: Энд тэндхийн шоунаас гарч ирсэн хэдэн шалдан охин тайзан дээр гарч ирж амаа хөдөлгөчихөөд надаас 2-3 дахин илүү үнээр дуулдаг.

 Ам баригчдыг жинхнээсээ үзэн яддаг. Үүнийг яагаад одоо хүртэл хуульчлахгүй байгаа юм. Энэ чинь луйвар. Би тоглолтоо хийлээ та нар ирээд үз, би амьдаар дуулна гэж зарлачихаад тоглолт дээрээ амаа хөдөлгөөд дуулна гэдэг бол хүмүүс сидиг нь гэртээ тавиад сонсч байгаатай ямар ч ялгаа байхгүй.  Энэ бол шударга бус байдал. Би тийм үнэтэй дуулдаг хүн биш. Харин энд тэндхийн шоунаас гарч ирсэн хэдэн шалдан охидууд тайзан дээр гарч ирж амаа хөдөлгөчихөөд надаас 2-3 дахин илүү үнэ авдаг. Ядаж тэр нь сэтгэ.мн гээд тамгатайгаа явж байхыг нь яана. Ийм луйварт нөгөө том продакшнууд нь хүртэл идэгдчихсэн. Гавьяат цолтой хүмүүс өнөөдөр хамтлагийн продюсер хийж байна. Тэр хүмүүс гавьяа байгуулсан гээд цол хэргэм авсан. Тэгвэл тэр гавьяагаа яагаад харуулахгүй, үүрэг хариуцлагаа хүлээхгүй байгаа юм бэ?. Үнэндээ энэ асуудал дээр миний сэтгэл гутардаг. Амьдаар дуулуулж чадахгүй бол тэр хамтлагуудаа тараах хэрэгтэй.
Дуулж чадахгүй байгаа хүмүүсийг амаа хөдөлгөгч гэж нэрлэх ёстой байх. Эсвэл шалдан гарч ирээд бүжиглэхэд нь зарим хүн дуртай байж магадгүй юм. Юу нь гоё гэж. Үзэгчид үүнд маш их буруутай. Үүнтэйгээ эвлэрчихсэн байна. Өө яахав, яахав угаасаа л ам барьдаг юм чинь гэж хүлээж авдаг. Мөнгөө төлж тоглолт үзэж байхад, ам барьж байвал чулуу шидээд хөөж буулгах ёстой шүү дээ.

Гитарчин Өлзий-Орших:Хөдөлмөрчин хүн хөдөлмөрлөж олсон мөнгөөрөө билет худалдаж аваад орж ирж байхад CD тавиад зогсдог гарууд тайзнаас зайлвал таарна

Сүүлийн үед энэ панаграмчингууд арай дэндлээ. Бүтэн тоглолтын турш бүх дуугаа ам барьдаг дуучны тоглолт үзлээ. Зарим тоглолт дээр бүтэн оркестр хуруугаа хөдөлгөж, дүр эсгэж суусан сураг байна. Хөдөлмөрчин хүн хөдөлмөрлөж олсон мөнгөөрөө билет худалдаж аваад орж ирж байхад CD тавиад зогсдог гарууд тайзнаас зайлвал таарна.

    Т.Ариунаа:Шинээр гарч ирж байгаа хамтлаг дуучид л амьдаар дуулаад сурчихвал рок, поп урлагийн нэр хүнд өснө.

Залуу дуучид маань айхгүй, зоригтой байх хэрэгтэй. Тэд амьд хөгжимтэй, амьдаар дуулна гэхээр айцгаадаг. Ялангуяа шинээр гарч ирж буй охидын хамтлаг ам барих гээд байдаг талтай. Шинээр гарч ирж байгаа хамтлаг дуучид л амьдаар дуулаад сурчихвал рок, поп урлагийн нэр хүнд өснө. Одоо үед хүссэн хүн бүхэн улс төрч, дуучин болчих юм. Урлагийн босго өндөр гэдгийг тэдэнд ойлгуулах л хэрэгтэй байна.

Gee-гийн хэлснээр амаа хөдөлгөгчдийн талаар жинтэйхэн хэдэн үг хэлсэн уран бүтээлчдийн яриаг нэмэлт хачиргүйгээр хүргэлээ.