Төрийн байгуулалтын байнгын хороогоор өнөөдөр Төрийн нууцын жагсаалтыг батлах тухай хуульд өөрчлөлт оруулах төслийг хэлэлцсэн ч МАН-ын бүлэг завсарлага авсан. Иргэдийн овог нэр, гэрийн хаяг, гэрлэлтийн байдал гэх зэрэг мэдээллийг нууцын жагсаалтаас гаргах талаар УИХ-ын гишүүд ямар байр суурьтай байсныг хүргэе.

- УИХ-ын гишүүн М.Батчимэг:
- Өөр өөр төрийн байгууллагууд иргэдийн энэ мэдээллийг яаж дамжуулах вэ гэдгийг Төрийн нууцын хуулийн дагуу зохицуулах хэрэгтэй. Хэрэв төрийн нууцад орсон мэдээллийг хэрэглэж, ашиглахгүй байгаа нь өөрөө төрийн мэдээллийн аюулгүй байдал. Мэдээллийг хоорондоо дамжуулна гээд төрийн нууцаас гаргах нь буруу. Тагнуулынхан ажлаа хийж чадахгүй байгаа болохоор ийм асуудал гараад байна. Төрийн нууцын жагсаалтын дагуу өөрчилж, хүний хувийн мэдээллийг нууцаас гаргах ёсгүй. Хэзээ өргүүлсэн, эцгээ тогтоолгосон бэ гэдэг хувийн мэдээлэлд төр халдаж болохгүй. Үүнийг төрийн байгууллагууд хуваалцаж болно. Тэгэхээр жагсаалтаа өөрчлөх биш төрийн нууцын тухай хуулийг өөрчлөх ёстой. Мэдээлэл хуваалцах дэгээ өөрчлөх ёстой. Үүнийг нууцын жагсаалтаас гаргавал наад зах нь мэдээлэл дээр ажиллаж байгаа төрийн албан хаагч хариуцлага алдахад ямар арга хэмжээ авах вэ? Хаана амьдарч байгаа, ямар утасны дугаартай вэ гэдгээ тэр хүн олон нийтэд мэдүүлэхийг хүсэхгүй байж болно. Энэ нь ерөөсөө үндэсний аюулгүй байдлын концепцтэй зөрчилдөж байна. Би Засгийн газар ажлаа муу хийж байна гэж үзэж байгаа. Энэ мэдээллийг ийм байгууллагууд хуваалцана, ил болговол ийм хариуцлага хүлээлгэнэ гэдгээ тодорхой болгох ёстой.

- УИХ-ын гишүүн Р.Гончигдорж:
- Улсын нууцад нэвтрэх шаардлага, дэглэм нь өөрөө бий болвол асуудал шууд шийдэгдэнэ. Нууцалсан мэдээллийг дэлгэх эрх нь бүрэн хязгаарладаж байгаа юм.  Энэ асуудлыг хэлэцэх нь зүйтэй ч улсын нууц, хувийн, төрийн байгууллагын нууц гэдэг мэдээллийг хэрхэн хэрэглэх вэ гэдэг хамгийн чухал болчихоод байна.  Хоёр байгууллага хоорондоо нэвтрэлцэх эрхтэйгээр хүнд суртлыг арилгаад байгууллага хоорондын харилцаагаа нэвтрэлцээд арай аюулгүй байдлын хүрээнд задардаггүй байх хэрэгтэй.