Тариалан эрхлэлтийг дэмжих сангийн захирал асан Л.Дүйнхэржав, Үйлдвэр  хөдөө аж ахуйн яамны Төрийн нарийн бичгийн даргаар ажиллаж байсан Т.Гантулга нарыг их хэмжээний мөнгө завшсан хэргээр шалгаж эхэлжээ.

Тэднийг Япон улсаас манай улсад хэрэгжүүлсэн “KP-1” төслийн хүрээнд буцалтгүй тусламжаар олгосон 9.5 мянган тонн хүнсний цагаан будааг борлуулсан мөнгө болох 12 тэрбум төгрөгийг зориулалтын бусаар зарцуулсан болохыг илрүүлсэн байна.

Мөн тэд энэ мөнгөнөөс 900 сая төгрөгийг аж ахуйн нэгжээс бэлнээр авч хувьдаа завьшжээ. Тэд Японы албан ёсны зөвшөөрөлтэйгээр хуримтлагдсан мөнгийг зарцуулна гэсэн Засгийн газрын гэрээг зөрчсөн гэнэ.  Уг хөрөнгийг хоёр улсын Засгийн газрын хооронд байгуулсан гэрээ бөгөөд ноот бичгийн дагуу хуримтлалын сан үүсгэж дансанд байршуулах байжээ. Тус хэргийг УМБГ-т үргэлжлүүлэн шалгаж байгаа аж.