Батлан хамгаалахын сургуулийн харъяа “Тэмүүжин өрлөг” сургуулийн захирал асан, хурандаа С.Наранцогт өнөөдөр сэтгүүлчдэд мэдээлэл хийлээ.  ”Тэмүүжин өрлөг” тусгай сургуулийг хуурамчаар үүсгэн байгуулж их хэмжээний хөрөнгө завшсан бөгөөд эл үйлдэл нь нийгэм, эцэг эхийн эрх ашгийг зөрчиж байгаа  учир ийн хурал зарласан аж.  Хурандаа С.Наранцрогтын хэлж буйгаар “Тэмүүжин өрлөг” тусгай сургууль нь ардчилал хөгжсөн энэ нийгэмд анх удаа батлан хамгаалах бодлогын хүрээнд байгуулагдсан сургууль аж.  Гэтэл цэргийн хичээлүүд нь орохгүй, ерөнхий боловсролын сургуулиас ямар ч ялгаагүй байгаа гэнэ. Түүнчлэн Батлан хамгаалахын сургуулийн “Тэмүүжин өрлөг” сургуулийг нээлттэй болгох нь зүйтэй. Энэ сургуулийг хувийн ашгийн үүднээс ажиллуулж, их хэмжээний мөнгө завшиж  байна хэмээн тэрбээр сэжиглэж  байгаагаа сэтгүүлчдэд  мэдэгдлээ.

-“Тэмүүжин өрлөг ” сургууль нь Батлан хамгаалахын цэрэгжсэн сургууль гэсэн үг үү?

- Батлан хамгаалах яамны сайдаар Л.Болд ажиллаж байх үед батлан хамгаалах бодлогын хүрээнд энэ сургууль байгуулагдсан. Л.Болд сайдын 79 дүгээр тушаалаар “Тэмүүжин өрлөг ” цэрэгжсэн сургууль байгуулах тушаал гарсан байдаг. Улмаар энэ сургуулийг байгуулахыг Батлан хамгаалах сургуулийн захирал Болбаатар гэх хүнд даалгасан байдаг. Гэтэл Болдбаатар тушаалынх заалтуудыг хэрэгжүүлээгүй, хууль ёсоор энэ сургуулийг байгуулаагүй байгаа юм. “Өрлөг” гээд нэртэй ерөнхий боловсролын сургууль байгуулах захирамж гаргуулаад л энэхүү сургуулийг байгуулчихсан. Тэгэхээр Л.Болд сайдын цэрэгжсэн сургууль байгуулах тушаалыг зөрчөөд ерөнхий боловсролын сургууль байгуулсан хэрэг. Ямар материалаар яаж энэ сургуулийг байгуулсан нь ч тодорхойгүй. Болдбаатар тушаал гаргачихаад өөрийнхөө эхнэрийн дүү, бармен хийж, пеонорын удирдагчаар 2 жил ажиллсан Энхамгалан гэдэг хүнийг тус сургуулийн менежерээр тавьсан. Ингээд хамаатан саднуудын эрх ашгийн төлөөх сургууль болж хувирсан.

-Тэгэхээр энэ сургуулийн удирдах албан тушаалд эхнэрийнхээ дүүг ажиллуулаад хүрээллээ тогтоосон гэсэн үг үү?

-Боловсролын яамнаас өгсөн тусгай зөвшөөрлийг зөрчөөд Энхамгалан гэх хүнийг ажиллуулсан.  2010 оны зургаан сард томилсон. Улмаар энэ хоёр хүн мөн л хууль зөрчин цэрэгжсэн сургууль гэх зүйл гаргаж ирсэн байгаа юм. Ингээд хууль бусаар үйл ажиллагаа явуулж байхад нь би 2010 оны наймдугаар сарын 2-нд БХЯ-ы төрийн нарийн бичгийн даргын тушаалаар  мөн өөрийнхөө сонирхолд хөтлөгдөөд энэ сургуулийн захирлаар ирсэн.  Ингээд гурван жил энэ сургуулийг удирдсан. Энэ гурван жилийн хугацаанд санхүүгийн асуудал маш хаалттай байсан. Гарын үсэг зураад цалингаа авахаас хэтэрдэггүй байлаа.

-Ямар үндэслэлээр та ажлаасаа халсан юм бэ?

-Хамгийн гол би өнөөх эхнэрийнх нь дүү Энхамгаланг хэд хэдэн үндэслэлээр захирал байх хугацаандаа ажлаас нь халчихсан. Сургалтын менежерийн ажлын байрны шаардлага хангахгүй, ёсзүйн ноцтой зөрчил гаргасан гэдэг үүднээс дүүг нь халсан. Гэтэл ах нь гурван хоногийн дараа намайг халсан. Ямар ч шалтгаангүй халсан. Ядаж ийм учраас хална гэж сарын өмнө ч гэсэн мэдэгддэг. Ингээд би ер нь яагаад санхүүгийн асуудлууд нь хаалттай, мөн дүүг нь халараар намайг халдаг нь ямар учиртай юм гэж бодоод сургуулийнхаа байгуулагдаж байсан үеэс эхлээд бүгдийг судалсан.

-Та өнөөдрийн  энэ хурлаар яг юуг илэрхийлэх гэсэн юм бэ?

- Ажлаасаа халагдчихлаа гэж би үүнийг яриагүй. Харин асуудал юундаа байна вэ гэвэл “Тэмүүжин өрлөг” сургууль 84 сая төгрөгийн өрөнд орсон гэсэн мэргэжлийн байгууллагын акт гарсан. Мөн "Тэмүүжин өрлөг" сургуулийг байгуулахдаа стандартад нийцэхгүй, хууль бусаар байгуулсан байна. Цэрэгжсэн сургууль биш ерөнхий боловсролын сургууль нэрийн дор үйл ажиллагаагаа эхэлсэн.  Одоогоор шалгуулахаар ханддаг бүх байгууллагуудад нь өргөдлөө биччихээд байгаа.

Д.Ундрах /24tsag.mn/