“Атар” талхны үнэ нэмэгдэж 850 төгрөг болсон гэх мэдээлэл хоёр хоногийн өмнөөс хэвлэлүүдээр гарч эхэлсэн. Урьдчилж мэдэгдэлгүйгээр бүхэл бүтэн 250 төгрөгөөр  үнээ нэмлээ гэж иргэд “Талх чихэр” компанийг буруутган өнгөрсөн хоёр өдөр Шудрага өрсөлдөөн хэрэглэгчдийн төлөөх газрыг гомдлоор булсан гэнэ.

Өмнө нь 630 төгрөгөөр зарагдаж байсан “Атар” талх сая 170 төгрөгөөр нэмэгдэж 800 төгрөг болжээ. Гэхдээ савлагаатай, савлагаагүй гэсэн хоёр янзаар худалдаанд гарч байгаа. Иргэд савлагаагүй талхыг хуучных шигээ 630 төгрөгөөр авч болох бол гялгар уутанд савласан талхыг 800 төгрөгөөр авах юм. Тодорхой хэлбэл ууттай талх 800, уутгүй нь 630 төгрөг. 

Ингэсний учир нь савлагаагүй “Атар” талх нь хүнсний тухай хууль, стандарт заалтуудыг зөрчиж байгаа тул савлагаатай худалдаанд гаргах шаардлыг НМХГ-аас “Талх чихэр” компанид тавьж, хариу арга хэмжээ авч ажиллах үүргийг өгсөнтэй холбоотой аж. Цаг агаар, хөрсний бохирдол, тээвэрлэлт зэрэг хүчин зүйлийн нөлөөгөөр талх бохирдож хэрэглэгчдийн хэрэглээ, сонголт, шаардлагад нийцэхгүй байгаа тул ийм шийдвэр гаргасан гэсэн мэргэжлийн хяналтын дүгнэлт гарсан байна. Ямартай ч талх 800 төгрөг болсон гэж иргэд санаа зовж, сандрах шаардлага байхгүй аж. Шинийг авмааргүй байвал хуучнаа авч идэх сонголт бас таньд байна.

Ингэхэд бас учир бий. Хэрэглэгч та 170 төгрөг нэмж савлагаатай талх авч идэж чадахгүй бол бохирдсон эрүүл мэндэд сөрөг нөлөө үзүүлж болох талх иднэ гэсэн үг юм.

Хэрвээ 170 төгрөгөө нэмээд савлагаатай талх авбал эрүүл ахуйн шаардлагад нийцсэн бүтээгдэхүүн хүнсэндээ хэрэглэнэ гэсэн үг.  Мэдээж иргэдийн ихэнх нь эрүүл мэндээ бодож хүссэн хүсээгүй савлагаатай талхыг сонгоно.


“Талх чихэр” компанийн ажилтны хэлж буйгаар шинэ уут нь  компьютерийн хяналт, лазер мэдрэгч, зүсэгч, уутны ам нээгч, боогч гэх мэт орчин үеийн савлагаанд шаардагдах бүх технологийг агуулснаараа давуу талтай гэнэ. Эл уут нь хадгалалтын горимд чийг даах, хатаж хорчийх, гаднын нян нэвтрэх зэрэг эрсдэлээс бүрэн хамгаалах зориулалт бүхий агаар нэвтрүүлэгч нүхтэй аж. Шинэ савлагааны уут нь 94 төгрөгийн өртөгтэй бөгөөд хөргөж савлахад зориулагдсан тоног төхөөрөмж ашигласны болон хүргэлт, үйлчилгээ, тээвэрлэлтийн зардалд үлдсэн мөнгийг нь нэмж тооцож байгаа аж.

Шурдага өрсөлдөөн хэрэглэгчдийн төлөөх газраас энэ тал дээр ямар тайлбар хийж байна  гэхээр “Талх чихэр бол зүй ёсны монополь байдалтай байгууллага биш. Тэгэхээр тус компани үнээ нэмлээ гэхэд манайхаас торгууль ноогдуулж чадахгүй. Давамгай байдалтай байгууллагад манайхнаас арга хэмжээ авч чаддагүй юм. Хуулиндаа тэгэж заасан байдаг. Бид үнээ нэм, буулга гэсэн шаардлыг тавьж болохгүй гэсэн үг. Гэхдээ тус компаниас манай дээр үнийн саналаа явуулсан байгаа. Түүнд “Атар” талхыг уутлаад савлахад 200-250 төгрөгөөр нэмэх хэрэгтэй байна гэсэн. Бид тэр тооцоог нь судалж үзээд 170 төгрөгөөр нэм гэсэн хариуг өгсөн” гэсэн юм.

Ингээд ууттай, уутгүй, зүссэн, зүсээгүй гэх олон сонголттой "Атар" талхнаас алийг нь авах нь таны дур болж байна.