"Монголын төмөр зам" төрийн өмчит компани гэх их мөнгөний тоо яригдсан газарт сүүлийн үед олон хүний нүд ороод байна. МҮАН-ын дарга М.Энхсайхан гурван сар ажиллаад дуулиантайгаар халагдсан ч тэрбээр мөчөөгүй  өгөхгүй нэхэл хатуутай байна. Өчигдөр гэхэд тэрбээр Зам тээврийн сайдын дэргэдэх шуурхай хуралдааны үеэр хурааж авсан нууц биш бичлэгийг төрийн нууц задрууллаа гэж сүр дуулиантайгаар зарласан ч газар авсангүй. Энэ бол түүний Х.Баттулга нарт мөчөөгүй өгөхгүй гэсний нэг илрэл болов уу. Сэтгүүлчид чухам ямар учиртай бичлэг болохыг тайлбарлаагүй бол Зам тээврийн яам ингэж төрийн нууцад халддаг гэх зэргээр их л шуугиан тарьж А.Гансүх сайд нэлээд ховонд хутгагдах байлаа. Ер нь М.Энхсайхан "Монголын төмөр зам"-аас "хууль бусаар халагдсан" гэдэгтээ бүрэн итгэлтэй байгаа бөгөөд тийм ч учраас твийтрээр байнга л энэ талаар гомдоллох болжээ. Тэрбээр "Бондын мөнгө үргүй зардал болох магадлал өссөөр байна. Хуйвалдаан шатлан өргөжиж байгаа юм байна. Бондод хэн Чингис гэсэн нэр өгчихөв өө? Өр болсон хойно нь Монголыг Чингис нэртэй нь худалдаж авах байлгүй дээ. Яг л Грек бусад орон шиг. Том том завхралууд олонд ил болж байнаа. Бондыг завхруулбал Монгол "failed state" болно" гэх зэргээр өдөр бүр бонд эсвэл Х.Баттулгын тухай жиргэдэг болсон байх юм. Гэхдээ М.Энхсайханы "Монголын төмөр зам"-ын захирлаар томилогдсон үнэ цэнэ их юм. Тэр сонгуулийн өмнө нийлж эвссэн МАХН-ын дарга Н.Энхбаярыг баривчлагдснаас хойш нүүр буруулж, нэг ч удаа очоогүйн дээр "Би Н.Энхбаярыг хэлмэгдсэн гэж хэлж чадахгүй" гэх оны алдарт үгээ хэлсэн. Олон жил найзын зиндаанд байж хамтрагч болсон хүнээсээ татгалзан байж "Монголын төмөр зам"-ын захирал болсон болохоор ингэж нэхэл хатуутай байх нь арга ч үгүй юм уу. Дээр нь намынхаа ажилд ч оролцохоо байж "тусгаар" хүн болсон. Түүнийг ажлаасаа халагдсныг өмөөрч намынх нь нэг ч гишүүн дуугараагүй билээ.
    Ядаж байхад М.Энхсайханыг ажлаас чөлөөлсний дараа Зам тээврийн яам жолоочийг нь ч бас халчихжээ. Үүнийг М.Энхсайхан ч бас шоу болгох боломжоо алдсангүй. Тэрбээр "Монголын төмөр Зам компанид ажиллах богинохон хугацаандаа би нэг ч хүнийг ажлаас халаагүй, хоёр хүнд сахилгын арга хэмжээ ногдуулсан байх. Анх очиход нэгэн залуу миний жолоочоор ажилласан. Надаас өмнө ажилд орсон байсан хэрэг. "Харин шинэ дарга нь жолооч ажилтай залууг маань ажлаас нь хална хэмээн машиныг нь хурааж. Бодлого зөрсөн юм болов уу? Өргөн нарийн царигаас болов уу? Ямар ч байсан нэг залуу надаас болж ажилгүй болчих шиг боллоо. Бие хамгаалагч Б.Батзаяагийн мэддэг чаддаг ажил байх" гэсэн байх юм. Хэдхэн сарын өмнө гар барьж, ажилд урьсан Засгийн газар нь төрийн албан хаагчдыг "сэлбэх" аяндаа түүний жолоочийг ч хамруулахаа бас мартсангүй. Түүний нам, найз нөхдөөсөө илүүд үзсэн албан тушаалаасаа халагдсан нэхэл хатуу нь ойрын үед лав тайлагдахгүй болов уу.