Монголын уран бүтээлчид өөрсдийн бүтээсэн киноныхоо ашиг орлогыг "Box Office"-оор зарлахаар болжээ. Мөн уран бүтээлчдийн хөрөнгө мөнгө, цаг хугацаа, хүч хөдөлмөр зарцуулан байж хийсэн киноны ашгийн 60 хувийг тухайн гаргасан кино театрууд нь авдаг. Тэгвэл энэхүү шударга бус журмыг өөрчлөхөөр болжээ. Учир нь ССАЖЯ, шударга өрсөлдөөн хэрэглэгчийн төлөө газраас дээрх үйл ажиллагааг хийхээр болсон гэнэ. Ингэснээр киноны уран бүтээлчид ашгийнхаа 50-55 хувийг авах боломжтой болж байгаа юм байна. Энэ талаар Монголын кино урлагийн зөвлөлийн Ерөнхий нарийн бичгийн дарга Б.Ганболдоос тодруулсан юм.

-Киноныхоо ашиг орлогыг "Box Office"-оор зарласнаар ямар ач холбогдолтой вэ?
-Box Office-оор зарлана гэдэг тухайн кино хэчнээн төгрөгний орлого олж байгаа гэдэг нь ил тод харагдана. Хоёрдугаарт энэ киног ямархуу хэмжээний үзэгчид үзэж байгаа нь харагдана. Нэг ёсны киног сайн, муу болсон эсэхийг үзэгчдээр тодорхойлно гэсэн үг. Гуравдугаарт, уран бүтээлчийнхээ хувьд, хэзээ мөнгөтэй боло, хөрөнгө оруулагчийн хувьд  хэдийд  тухайн кинонд оруулсан мөнгө маань ашгаа өгч эхлэх вэ гэдэг нь тодорхой болж эхэлнэ. Энэ бүхэн ил тод байж кино урлаг хөгжиж эхэлнэ.

-"Box Office"-ийг яагаад анхнаасаа зарлаад явчаагүй юм бэ?
- Тухайн үед зарлах боломжгүй байсан. Асуудлууд тулгардаг. 60 хувиа хүнд өгчихөөд 40 хувийг зарлана гэдэг утгагүй. Одоо бол нээлттэй болж эхэлнэ.

-Уран бүтээлчид киноныхоо 52-55 хувийг авдаг болно гэсэн. Тэгэхээр яг энэ хувиа иргэдэд зарлана гэсэн үг үү?. Нийт ашиг, орлогоо зарлах юм уу?
-Нийт орлгооо зарлана. Гэхдээ кино театруудтай тохирно. 

-Кино театрууд урамшуулал зарладаг. Тухайлбал Мягмар, Лхагва гарагт хямдралтай гэдэг? Үүнийг тухайн киноны уран бүтээлчдээс авдаг хэрэг үү?
-Тийм. Бидний авдаг 40 хувиас энэхүү урамшууллуудаа авдаг. Одоо тэгэхээр кино театрууд урамшуулал зарладагаа болино.

-"Монгол кино үйлдвэр"-ийн даргатай нь холбоотой сөрөг мэдээллүүд цацагдаад байгаа. Монгол кино хийж байгаа нэрийдлээр төрөөс их хэмжээний мөнгө авдаг. Мөн монгол киноны хувцас эдлэлийг зардаг гэх мэт?
- Би "Монгол кино үйлдвэрт" 1982-1988 хүртэл туслах найруулагчаар ажилласан. Солонго захирлын энэ асуудлыг АТГ шалгаад, үнэн зөвийг гаргаж ирнэ биз. Гэхдээ Солонго захирал бол 15 жил төрийн албанд ажилчихаад "Монгол кино үйлдвэр"-ээ өөд нь татах ёстой байтал харин эсрэгээр үрж тарааж, аль болохоор хувийн эрх ашгийн төлөө ажилласан.