УИХ-ын гишүүн Ё.Отгонбаяр Булган аймгийн өвөлжилт хүндэрсэн сумдад ажиллав. Аймгийн хэмжээнд 16 сум, 1 тосгоны 75 багийн 7200 гаруй малчин өрхийн 2,5 сая мал өвөлжиж байна.. Чилэнгийн отрын бүсэд 60,000 мал орох боломжтой. Одоогийн байдлаар Төв аймгийн 2 сум, Өвөрхангайн аймгийн 3 сумын 66 өрхийн 39,000 гаруй мал өвөлжиж байгаа.
    УИХ-ын гишүүн Ё.Отгонбаяр өвөлжилт хүндэрсэн Баяннуур, Дашинчилэн,Гурванбулаг, Рашаант, Хутаг Өндөр, Тэшиг сумдын удирдлагуудтай уулзаж цаг үеийн байдалд авч байгаа арга хэмжээг идэвхжүүлэх, төвөөс хуваарилсан өвс тэжээл, хөрөнгө санхүүгийн хуваарилалтын талаар арга хэмжээ авснаас гадна малчидын өвөлжөөнд очин нөхцөл байдалтай газар дээр нь танилцаж, малын эм тарианы цуглуулгыг зарим баг сумдад өгөв. Мөн Хишиг Өндөр, Хутаг Өндөр сумын эмнэлэгт зүрхний бичлэгийн аппарат, шээсний шинжилгээний аппарат тус бүр нэгийг олгосон байна.
    Булган аймгийн онцгой комиссыг хуралдуулж, цаг үеийн яаралтай арга хэмжээ авах, одоо байгаа болон төвөөс шийдэгдсэн өвс тэжээл хөрөнгө санхүүгийн зохицуулалтын талаар аймгийн онцгой комиссын удирдлагуудтай зөвлөлдөв. Өвөлжилт хүндэрсэн сумдуудаас 860 тн өвс, 122 тн тэжээл авах хүсэлт ирүүлснийг улсын болон онцгой комиссын гишүүд, УИХ-ын гишүүн газар дээр нь очиж танилцаад 105 тн өвс аймгийн нөөцөөс, улсын нөөцөөс 50 тн өвс, 77 тонн тэжээл бэлтгэн Хутаг өндөр суманд 25 тн, Гурванбулаг Рашаант суманд 20 тн , Хангал, Баяннуур, Дашинчилэн сумдад 15 тн, Тэшиг,Могод, БаянАгт сумдад 10 тн өвс, Рашаант суманд 7 тн, Хутаг Өндөр, Орхон, Бүрэгхангай, Булган сумдад 5 тн тэжээлийг тус тус олгохоор хуваарилжээ.
    Энэ оны 1 дүгээр сарын дунд үеийн байдлаар Рашаант, Дашинчилэн, Баяннуур, Гурванбулаг сумдын нийт нутгаар, Хутаг Өндөр, Хишиг Өндөр сумын хойд багууд, Тэшиг , Хангал сумын нутгаар 10-23 удаа цас орж цасны зузаан 20-40 см, хунгарлаж шуурсан газраа 40-120 см хүрч, цас нягтарч дагтаршсны улмаас ялангуяа бог мал бэлчээргүй болж, шилбэ хөл нь халцрах ,тэжээлийн хомсдолд орж өлдөх, хэвтэр бууц нь хөлдөх байдал гарч байна.
    Булган аймгийн өвөлжилт хүндэрсэн сумд нийт бэлтгэсэн өвс, тэжээлийнхээ 60 гаруй хувийг хэрэглэчихээд байгаа, Малын хорогдлын тоо 3000 шахам болоод байна.