УИХ-ын чуулганаар С.Бямбацогт гишүүний Ерөнхий сайд Н.Алтанхуягт тавьсан асуулгын хариуг гишүүд сонслоо. УИХ-ын гишүүн С.Бямбацогт Шинэчлэлийн Засгийн газар төрийн албан хаагчдыг олноор нь халж байгаа мөн түр орлон гүйцэтгэгч томилсон нь хуульд хэрхэн нийцэж байгаа талаар асуулга тавьсан. Ерөнхий сайдын хариултыг ЗГХЭГ-ын дарга Ч.Сайханбилэг уншиж танилцууллаа. Тэрбээр "Төрийн албан хаагчдыг хуулийн дагуу зөвхөн туршлага, мэдлэг чадвар пээр нь суурилан сонгох зарчим барьж байгаа. Тиймээс ч Нийтийн албаны хуулийн төслийг өргөн мэдүүлэхээр бэлдэж байна. Шинэчлэлийн Засгийн газар зарим яамдын бүтэц, чиг үүргийг өөрчилсөн. Яам нь татан буугдсан эсвэл чиг үүрэг нь өөрчлөгдсөн бол тухайн яамны төрийн нарийн бичгийн даргыг өмнө нь авч байсан цалинг бууруулахгүй өөр албан тушаалд томилох бололцоо байгаа. ГХЯ-ны төрийн нарийн бичгийн дарга өөрийн хүсэлтээр ажлаасаа гарсан, ЭМЯ-ны төрийн нарийн бичгийн дарга төсвийн мөнгөнд хяналт тавьж ажиллаагүй тул хариуцлага тооцсон. Түүний хариуцлагагүй байдлаас болж төрөх эмнэлэг, ахмадын эмнэлгийг хугацаандаа ашиглалтанд орох боломжгүй болсон тул ажлаас нь чөлөөлсөн. Сангийн яамны төрийн нарийн бичгийн даргыг УИХ-д өргөн мэдүүлсэн 2013 төсвийн төслийн баримт бичиг болон бусад бичигт алдаа гаргасан тул халсан. Мөн төрийн албан хаагчийн төр орлон гүйцэтгэгчийг томилох журмыг батлах эрх нь Засгийн газарт байдаг" гэлээ. Харин МАН-ын гишүүд энэ хариултыг хангалтгүй гэж үзэн шүүмжлэлтэй хандаж байлаа.

   УИХ-ын гишүүн Я.Содбаатар: "Төрийн албан хаагчдыг намаар нь ялгаж халж байна. Ч.Сайханбилэг 2004 онд гишүүн Мэдээлэл технологийн газрын даргаар ажиллаж байсан" гэхэд Ч.Сайханбилэг гишүүн "Я.Содбаатар гишүүн МХЕГ-ын даргаар ажиллаж байхдаа 31 хүнийг халж, 55 хүнийг ажилд авсан. Гурван шийдвэр тутмын нэг нь хүн авч, халсан шийдвэр байна.  Төрийн албан хаагчид улс төрчдийг нүүдлийн шувууд гэж нэрлэдэг. Чаддаг юм бол халаарай, халвал шүүхэд хандъя гэдэг болсон байна" гэв.

УИХ-ын гишүүн Сү.Батболд: Туршлагатай, чадвартай албан хаагчдыг тогтвортой ажиллана гэсэн зарчим байхгүй болж байна. Бүгд ажлаа хийж чадахгүй гарсан гэж ойлгогдоод байна. Аман дээрээ сайхан ярьж байгаа ч амьдал дээр хавтгайгаар нь солиод байна. Үүнд Ч.Сайханбилэг гишүүн хариулахдаа Засгийн газар хууль зөрчсөн гэдгийг хүлээж авахгүй. Хоморголж, хавтгай халж байгаа асуудал байхгүй. Өнгөрсөн 4,5 сарын хугацаанд өөрийгөө үндэслэлгүй халлаа гэсэн гомдол гараагүй. Одоо төрийн албатай холбоотой хоёр хуулийн төсөл боловсруулж байна. Манайх төрийн албаны эрх зүй, процесс сул, шинэчлэх шаардлагатай байгаа. Мөн төрийн албан хаагчдын ёс зүйн асуудал, зохион байгуулалтыг өөрчлөх олон асуудал байгаа" гэлээ. Асуулт, хариулт үргэлжилж байна.