Энэ талаар ШӨХТГ-ын дарга О.Магнайгаас тодруулахад “Хэрэглэгчдийн эрх ашгийг хохироож ам барьдаг дуучдад ямар арга хэмжээ авах талаар хэлэлцэж байна.  Ямартай ч тодорхой мэдээллийг ирэх долоо хоногт зарлах хурал дээр хэлнэ. Дараагийн долоо хоногт болох хурал дээр бүх урлаг соёлынхон ирнэ” гэсэн юм. Тэгэхээр иргэдийн дунд тархаад байгаа “ам барьдаг” дуучдыг тайзнаас зайлуулна гэсэн яриа биелэлээ олж эхлэх нь.

ШӨХТГ-т салбар салбарын маш олон гомдол саналууд тасрахгүй байгаа гэсэн. Тэд эхнээс нь шат дараалалтайгаар санал гомдлуудыг ажил хэрэг болгон явж байгаа. Тиймээс хүмүүсийг хуурч, урлагийн нэр хүндийг доош нь татаж байгаа  “ам барьдаг” дуучдыг ч гэсэн таслан зогсоох, дорвитой нэг шийдэлд хүрэх байх.

Монголчууд маань өмнө нь ам барьж,  фонограмм тавьсан дуучдыг мэддэг хэрнээ шүүмжилдэггүй, угаасаа эл зүйл байх ёстой юм шиг л хүлээж авдаг байсан. Тэгвэл тэр үеэ бодвол шударга бус явдлыг хараад шүүмжилдэг, дуу хоолойгоо хүргэдэг болчихсон.

Реппер Gee л гэхэд “Амаа хөдөлгөдөг” одонцорууд гэж байгаад хатуухан хэдэн үг хэлж л орхисон. Хэлэх хэлэхдээ бүр хэнийг хэлээд байгаа нь ойлгомжтойгоор үг чулуудсан. Gee  “Энд тэндхийн шоунаас гарч ирсэн хэдэн шалдан охид тайзан дээр гарч, амаа, биетэйгээ хөдөлгөчихөөд  хэнэг ч үгүй хөлс авдаг.  Гавьяат цолтой хүмүүс өнөөдөр хамтлагийн продюсер хийж байна. Тэр хүмүүс гавьяа байгуулсан гээд цол хэргэм авсан. Тэгвэл тэр гавьяагаа яагаад харуулахгүй, үүрэг хариуцлагаа хүлээхгүй байгаа юм бэ?. Мөнгөө төлж тоглолт үзэж байхад, ам барьж байвал чулуу шидээд хөөж буулгах ёстой” гэж байсан. Тэгвэл ШӨХТГ болон урлагийнхны  хамтын ажилд Gee ч гэсэн гар бие оролцох биз ээ.

Харин гитарчин Өөжгийгийн хувьд ам барьдаг дуучдыг хамгийн их үзэн яддаг хүн. Тэгэхээр ямартай ч ШӨХТГ-тай хамтрах уран бүтээлчдийн дотор GEE, Өөжгий, Т.Ариунаа, Хаянхярваа нар байх нь гарцаагүй юм.

Д.Ундрах /24tsag.mn/