Дайны эрсдэлийн даатгалын сангийн мөнгийг гадаадын компанийн данс руу шилжүүлсэн гэх арван тэрбумын хэрэг олны анхаарлыг татаад байгаа. Уг хэргийг хоёр жил гаруйн хугацаанд шалгаж байгаа бөгөөд одоогоор "Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Ц.Орхон болон түүний эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг нарыг баривчлан цагдан хориод байгаа билээ. Тэднийг ШШГЕГ-ын харьяа цагдан хорих 461 дүгээр ангид хориод буй.
Мөн уг хэрэгт Төрийн өмчийн хорооны дарга асан Д.Сугарыг холбогдуулан баривчлах гэсэн боловч Үндсэн хуулийн цэцийн онцгой бүрэн эрхтэй гишүүн тул цагдаа болон хууль хяналтынхан албадан саатуулж чадахгүй байгаа билээ.
Хэргийг хоёр жилийн турш шалгаж байгаа ч ийнхүү удаашралтай байгаа талаар Улсын ерөнхий прокурор Д.Дорлигжав “ Уг хэрэгт хуулийнхан холбоотой байж магадгүй. Мөн төрийн өндөр албан тушаалтан, төрийн албан хаагч, хувийн болон бизнесийн компаниуд, хуулийнхан гээд олон удаагийн үйлдлээр, олон хэлбэрээр хууль бус үйлдэл хийсэн байж болзошгүй. Шалгалтын явцад арван тэрбум төгрөг бол сэжигтнүүдийн угаасан, залилсан мөнгөн дүнтэй харьцуулахад маш бага тоо. Маш их хэмжээний мөнгөний тухай яригдах байх” гэв.
Түүнчлэн энэхүү мөнгө угаасан дөрвөөс таван улс дамжин үйлдэгдсэн хэрэгт гурван шатны шүүхээс хорих ялаар шийтгүүлсэн МАХН-ын дарга Н.Энхбаярын хамаатан садан болох хэдэн хүнийг шалгаж эхэлжээ.
Мөн гадаадын хамтын ажиллагааны байгууллагуудтай хамтарсан шалгалт хийж, олон улсын Эрүүгийн цагдаагийн байгууллага буюу Интерполтой ч бас хамтарч ажиллаж эхэлсэн аж.
Б.Золбоо
Сэтгэгдэл (32)