Дэлхийн зах зээл дээр гаргасан "Чингис" хаан бондын мөнгөөр шинэ төмөр замын төслийн ажил нэлээн хэл амтай эхэллээ. Өчигдөр Үйлдвэр хөдөө аж ахуйн сайд Х.Баттулга төмөр замын ажлыг эхлүүлэх хамгийн анхны санхүүжилтийг шийдсэн тухай мэдэгдлээ. Энэ асуудлыг Ерөнхийлөгч, ерөнхий сайдаас эхлүүлээд бүх хүн анхааралдаа авч, өөрсдийн байр сууриа илэрхийлсэн. Ерөнхийлөгч Ц.Элбэгдорж төмөр замын ажил яагаад эхлэхгүй байгаа шалтгааныг шийдэх хэрэгтэй гэсэн бол Ерөнхий сайд Н.Алтанхуяг Зам тээврийн яамны боловсруулсан өргөн цариг ашиглах төслийг дэмжсэн. Ийнхүү олон сая доллар эргэлдэх төмөр замын бүтээн байгуулалт эхэлж байна. Өмнөх Засгийн газарт Зам тээвэр, барилга хот байгуулалтын сайдаар ажиллаж байсан, энэ төслийг гардан бичилцсэн Х.Баттулга гишүүн "Монгол улсын Засгийн газар 1947 оноос хойш анх удаа 1800 км төмөр зам барих эхний санхүүжилтийг шийдлээ. Энэ замыг эсэргүүцэн явуулахгүй гэсэн дотоод гадаадын маш том бүлэглэл бас байгаа шүү. Энэ төмөр зам биднийг дэлхийтэй холбоно мөн байгалийн хараалаас зугтуулна. Н.Алтанхуягийн тэргүүлсэн засагтт баярлалаа. Удахгүй Сайншандын шийдвэр гарна. Бид удахгүй хоёр, гурав, дөрөв, таван Эрдэнэт үйлдвэртэй болох юм. Цаасны ажлууд л яваад байна" гэж сэтгэл хөдлөн бичжээ. Харин энэ баярын мэдээний хажуугаар "Монголын төмөр зам" төрийн өмчит компанийн захирлын ажлаас хэл амтайгаар саяхан чөлөөлөгдсөн МҮАН-ын дарга М.Энхсайхан  дараах тайлбарыг хийсэн байна.

1. Засгийн газрын шийдвэрлэж байгаа 55 сая доллар нь урд нь Баттулгын төмөр зам барьж байна хэмээн энд тэнд манаргасан хохирлыг төсөв өөр дээрээ үүрч байгаа хэрэг юм. Бас ч үгүй дунд нь бизнес нь байгаа биз.
2. Маккинсей компанид төлбөр төлөх гэж Хаан банкнаас авсан 6 сая долларын төлбөр энд байгаа. Хайран мөнгө. Нэг тэрбум төгрөгийг нь Баттулга түүний нөхдүүд Маккинсейтэй гэрээ байгуулахад зуучилсан хэмээн авсан байгаа. Тухайн үед хууль хяналтын байгууллага шалгахад бэлэн болж байсан боловч сонгууль болж "нар" мандсан байдаг.
3. 1800 км төмөр замын анхдагч зурагт зориулсан мөнгө үүнд орж байна. Гадны компани хөлслөх юм.
4. Хуулийн, техникийн, санхүүгийн гээд гадаад мэргэжилтнүүдэд төлөх өндөр төлбөр орж байгаа. Хэнийг авах вэ гэдэг нь бизнес байдаг. Дүгнэлт нь "Ямар ч төмөр зам баригдахгүй нь ойлгомжтой болсоор байна" гэжээ.