Токио хотын шүүх сүмогийн их аварга Асашёрюүгаас 100 сая йенийг залилангийн аргаар завшсан 78 настай Такео Кикүчи гэх бизнесмэн эрд 5.5 жилийн хорих ял оноосон талаар тус улсын “Japan times” сонинд бичжээ.

 Кикучи Такео, Кумада Такахури хэмээх хоёр хүн Д.Дагвадоржоос 100 сая иен /1 280 000 ам.доллар/ зээлж аваад өгөөгүй билээ. 2009 оны хоёрдугаар сард энэ хоёр хүнийг нэг эмэгтэй Д.Дагвадоржтой танилцуулжээ. Тэд Монгол улс руу нэг трилион иений хөрөнгө оруулалт хийхийг хүсч байна гэж хэлж байсан аж. Хоёр сарын дараа буюу 2009 оны дөрөвдүгээр сард тэд “Филлипин улсад байгаа алтан гулдмайг авчрах гэтэл мөнгө хүрэхгүй байна, зээлээч” хэмээн Д.Дагвадоржид ханджээ. Гэвч одоог хүртэл өрийг нь төлөхгүй байсан учраас тэднийг цагдаад мэдүүлэн, баривчлуулсан гэнэ.

Кикүчи Такео 77 настай, Күмада Такахүри 63 настай бөгөөд Япон улсын Канагава бүс нутгийн засаг захиргааны ажилтнууд юм байна.

Шүүх хурлыг даргалсан шүүгч Юкихико Имасаки сурвалжлагчид ярихдаа, “Такео Кикүчи, Такахару Күмада нарын их аварга Асашёрюүд хэлсэн бүхэн худал байсныг тогтоосон. Тэд их аваргын эх орноо гэсэн сэтгэл дээр тоглон энэ бусармаг луйвраа үйлдсэн. Их аварга сайтар хянаж шалгалгүй, дэндүү гэнэн итгэмтгий зан гаргажээ” гэсэн байна. Луйварт оролцсон Такахару Кумадаг шүүх хурал хараахан болоогүй байгаа ажээ. Өмнө жилийн 11 дүгээр сарын 30-нд японы цагдаа нар Асашёрюү Дагвадоржийн гомдлын дагуу хоёр япон иргэнийг баривчилсан билээ.