АН-ын бүлгийн ээлжит хуралдаан дээр нийслэлийн засаг дарга бөгөөд Улаанбаатар хотын захирагч Э.Бат-Үүл "Гудамж" төсөл, гэр хорооллын дахин төлөвлөлтийг эхлүүлэх талаар мэдээлэл хийлээ. Тэрээр мөн агаар хөрсний бохирдлыг арилгах талаар авах арга хэмжээний талаар танилцуулж байгаа юм. Гэр хорооллыг дахин төлөвлөх ажлын явцын талаар тэрээр “Одоогийн байдлаар нийслэлийн орлогчид хотын зургаан хэсэгт гэр хорооллын газрын эзэдтэй уулзаж дахин төлөвлөлтөө танилцуулж иргэдтэйгээ ойлголцохоор ярьж байгаа гэв. Мөн гэр хорооллынхны 94% нь газраа өмчилж авсан тул газрын эзэд зөвшөөрөхгүй бол дахин төлөвлөлт хийгдэхгүй” гэсэн юм. 

Тэрээр мөн "Улаанбаатарын дулааны шугамны 80 орчим хувь нь ашиглалтын хугацаа дууссан байдаг ба инженерийн үйлчилгээг хүргэхэд эрсдэлтэй байна.

Сүүлийн 12 жилд нийслэлийн хүн ам 558 мянгаар буюу хоёр дахин өссөний 56 хувь нь механик өсөлт болоод байна. Үүнээс улмаас гэр хороолол хяналтгүй өргөжин, тэлжээ. Гэр хороолол ингэж хяналтгүй өргөжсөн нь утаа болон хөрсний бохирдлын гол шалтгаан болжээ.

Нийслэлийн 200 цэгт хөрсний бохирдлын хэмжээг авч үзэхэд нянгийн хэмжээ 16 дахин нэмэгдсэн нь тогтоогдсон. Улаанбаатарын утааны бохирдлын 60% нь гэр хорооллоос үүдэлтэй бол 20% нь тээврийн хэрэгслээс, үлдсэн 20% нь үйлдвэр, уурын зуухны яндангаас үүдэлтэй. Өнөөдрийн байдлаар нийслэлд 182.4 мянган айл өрхийн 586 орчим мянган хүн гэр хороололд амьдарч байна.

Агаарын бохирдлын 60 орчим хувь гэр хорооллын утаа байдгийн дээр хөрсний бохирдол ч сэтгэл түгшээх түвшинд хүрч иржээ. Улаанбаатар хотын 175 цэвэр усны эх үүсвэрээс Туулын эргийн дагуух найман цэвэр усны сан хөрсний бохирын нэвчилтээс болж ашиглах боломжгүй болж.

Эрдэмтэн мэргэжилтнүүдийн хэлж буйгаар энэ нь хотын хойд энгэрээс бие засах газрын бохир болон угаадас Туул гол руу чиглэн урсаж, нэвчиж байгаатай холбоотой юм. Мөн Улаанбаатар нэг төвтэй хот болж, Сүхбаатарын талбайгаа тойрон нийгмийн болон төрийн бүх үйлчилгээ төвлөрчээ. Энэ нь төв хэсгийн ачааллыг тэр дундаа автозамын түгжрэлийг бий болгож байгаа юм.

Захын хорооллуудад боловсролын үйлчилгээ хомс, инженерийн шугам сүлжээ болон нийтийн ахуйн үйлчилгээ хүрээгүйгээс нийгмийн хоёр өөр түвшин бий болоход нөлөөлсөн байна. Иймээс гэр хорооллыг дахин төлөвлөж, олон төвтэй хот болгох шаардлагатай болжээ" гэдгийг онцлон хэлсэн юм. 

Т.Хулан