Төрийн албаны дарга, даамлын албан тушаал ямар “ашигтай”, “амттай” ажил вэ гэдгийг сүүлийн үед илрээд байгаа дарга нарын улсын мөнгө завшсан хэргүүд харуулж байна. Ямар ч хараа хяналтгүй, дураараа дургиж байсан дарга нарын хэрэг өнөөдөр олноороо сөхөгдөж эхлээд байгаа. Ардчилсан нам төрийн албан хаагчдыг олноор нь халсан гэж буруутгагдаж байгаа ч тэдний зарим нь зүгээр ч нэг ажлаа өгөөд яваагүй бололтой. Ерөнхий сайд Н.Алтанхуяг "Тэр өргөдлөө өгөөд явсан хүмүүс өөрсдөө явсандаа харин ч баярлах хэрэгтэй. Өнгөрсөн хугацаанд хангалттай болох, бүтэхгүй зүйл хийсэн. Тиймээс ч нэг ч хүн эргэж заргалдахүй байгаа биз дээ. Зарим нь өглөө 8 цагт ажилдаа ирж чадахгүй гээд манай Засгийн газрыг зөвшөөрөөгүй. Ийм хүмүүстэй яаж хамтарч ажиллах юм бэ?" гэж байв. Тэгвэл түүний хэлсэн тэр задарсан төрийн албан хаагчдын татвар төлөгчдийн мөнгөөр хэрхэн тансаглаж байсан тухай бас нэгэн мэдээлэл ил боллоо. Үүнд МИАТ-ын мөнгө угаасан хэрэгт холбоотой шалгагдаж байгаа ИНЕГ ч багтаж байна. УИХ-ын дарга З.Энхболдын мэдээлснээр Татварын ерөнхий газар, Гаалийн ерөнхий газар, Иргэний нисэхийн ерөнхий газар өнгөрсөн Засгийн газрын үед буюу 2008-2012 оны хооронд олон тэр бумаар ажилчдаа ингэж тансаглуулжээ. 
Татварын ерөнхий газар гэхэд гадаад, дотоодын аялал, жуулчлал, амралт сувилалд 2011, 2012 онд тус бүр 219, нийт 438 хүнийг амраасан байна. Энэ нь нийт 632 сая төгрөг болж байгаа аж. Мөн өнгөрсөн жил 121 хүнийг орон сууцны зээл авахад нь 863,3 сая төгрөгийн дэмжлэг үзүүлжээ. Гаалийн ерөнхий газар ч мөн ялгаагүй 197 хүнд 3 тэрбум 603 сая төгрөгийг орон сууцны зээл авахад нь өгсөн байна. Харин дуулиант ИНЕГ зөвхөн 2012 онд гадаад томилолтоор 223 хүн явуулж, үүнд 1 тэрбум 248 сая төгрөг зарцуулсан байх юм. Мөн орон сууцны дэмжлэг байдлаар өнгөрсөн дөрвөн жилд 600 хүнийг хамруулж 14 тэрбум 64 сая төгрөгийн дэмжлэг үзүүлсэн байна. Нийтэд нь тооцож үзвэд энэ гурван байгууллагын амралт, аялал, орон сууцны дэмжлэг гэж ажилчиддаа зарцуулсан мөнгө нь 20 тэрбум 410,8 сая төгрөг болж байна. Үүнд нь 1579 төрийн албан хаагч хамрагджээ.
Чухам төрийн алба дөрвөн жилийн ээлжтэй гэдгийг мэдэрсэн үү, зөвхөн 2012 онд энэ гурван байгууллага бидний татварын мөнгөнөөс 8 тэрбум 223,8 сая төгрөгөөр албан хаагчдаа баярлуулж, үр ашиггүй зарцуулсан байх юм.
Төсвийн мөнгө бага, төрийн албан хаагчид гэж цалин бага ажил нь ихэдсэн хүмүүс байдаг гэх. Гэтэл ачир дээрээ хэдэн дарга нар нь өөрсөддөө талтай гэсэн хүмүүсээ ингэж тансаглуулж, "чин сэтгэлээсээ дэмждэг" байх нь. Энэ олон төрийн байгууллагаас зөвхөн гурвыг нь шалгахад ийм байна. Тэгвэл Х.Тэмүүжин сайдын шалгалт бүх төрийн албыг хамарвал үүнээс ч илүү их идсэн, уусан баримтууд гарч ирэх нь тодорхой болоод байна. Иргэд ч энэ идсэн уусан гэх хэрэгт гайхахаа больж байх шиг. Ямартаа ч 21 мянган төгрөгөө бүтэн сар хүлээдэг байсан иргэдийн мөнгийг үзэмжээрээ үрэн таран хийж байсан дарга нарт ямар хариуцлага ирэх вэ гэдэг нь чухал. Дараа дараагийнх нь сануулга аван биз ээ.
Т.Гэрэл
Сэтгэгдэл (6)