Сар шинийн баяраар ном бэлэглэхийг уриалж “Номтой нөхөрлөе” клубынхэн мэдээлэл хийлээ. Цагаан сарын баяраар Эрээний бараа бүтээгдэхүүнийг бэлэг болгон солилцох бус номыг бие биендээ бэлэглэхийг тус клубээс уриалж байгаа юм.

Клубынхэн Цагаан сарын баяраар бэлэглэж болох номын жагсаалтыг танилцуулах гэсэн хэдий ч ямар нэг албан байгууллагыг рекламдаж байгаа юм шиг ойлгогдох учир хэвлэл мэдээллийн хэрэгслээр сурталчилгаа цацаагүй гэж клубын үүсгэн байгуулагч Н.Хүлгэн хэллээ.

 Мөн зөвхөн баяраар биш цаашдаа ч энэ үйл ажиллагааг хэрэгжүүлэх зорилготой байгаа аж. Энэхүү үйл ажиллагааг МУИС-ийн багш оюутнууд дэмжин ажиллаж байгаа бөгөөд цаашид залуусыг тус клубд нэгдэхийг уриалж байсан юм.


“Номтой нөхөрлөе” клубын  “facebook” дэх групп нь одоогоор 8 мянган гишүүнтэй юм байна. Мөн тус клубын залуучууд долоо хоног бүр аль нэгэн зохиолчийг урьж, зохиол бүтээлээс нь танилцан уулзалт хийн ярилцдаг байна. Клубын гол зорилго нь залуу үеэ номтой нөхөрлүүлж оюунлаг, ухаалаг, бүтээлч болгоход оршиж байгаа аж.