Өнгөрсөн нэгдүгээр сарын 22-23-нд шилжих шөнө Баянгол дүүргийн арванхоёрдугаар хороонд байрлах “High class” зочид буудлын зургаан давхрын цонхоор 34 настай эмэгтэй унаж амиа алдсан хэрэг гарсан. Тэрээр тухайн үед “High class” зочид буудлаар нэг эмэгтэй найз болон хятад иргэнтэй хамт үйлчлүүлж байсан аж. Хятад иргэнтэй тус өдөр найзаараа дамжуулж танилцсан байна.
Эх сурвалжийн мэдээлснээр, тэднийг мөнгөнөөс болж маргалдсан гэдэг. Учир нь уг эмэгтэй тус хятад иргэнтэй тохирч буудал руу орсон бөгөөд орсон хойноо хятад иргэн мөнгөө өгөхгүй байжээ.
Тиймээс хохирогч эмэгтэй мөнгө өгөхгүй бол үсэрлээ хэмээн айлгаж өөрийн өрөөнөөс гарч буудлын зургадугаар давхрын 407 тоот өрөөний цонхон дээр очжээ. Гэвч удалгүй эмэгтэй буудлын зургадугаар давхрын цонхноос унаж, төмөр сараалжин торонд зоогдож амиа алдсан юм.
Гэхдээ өөрөө үсэрсэн эсвэл хүн түлхсэн эсэх нь одоогоор тодорхойгүй байгаа ч уг хэрэгт хамт явсан 35 настай найз Г, БНХАУ-ын иргэн У болон буудлын ресепшн зэрэг таван хүнийг шалгаж байгаа. Мөн БНХАУ-ын иргэн У-г ШШГЕГ-ын харьяа цагдан хорих 461 дүгээр ангид саатуулан шалгаж байгаа билээ. Хэргийг Баянгол дүүргийн цагдаагийн нэгдүгээр хэлтэс, Улсын мөрдөн байцаах газрын онц хүнд зохион байгуулалттай гэмт хэрэгтэй тэмцэх хэлтэс хамтран шалгаж байгаа юм.
Харин саяхнаас талийгаач эмэгтэйг санаатайгаар хөнөөсөн байж болзошгүй хэмээн БНХАУ-ын иргэн У-д эрүүгийн хэрэг үүсгэсэн хэмээн эх сурвалж мэдээллээ. Тодруулбал, түүнд Эрүүгийн хуулийн тусгай ангийн 91.1-т зааснаар хүнийг санаатай алах гэсэн зүйл ангиар эрүү үүсгэсэн байна. Тус зүйл ангид уг хэргийг үйлдсэн этгээдэд 10-15 жилийн хорих ялаар шийтгэнэ хэмээн заасан байдаг аж.
Юутай ч мөрдөн байцаалтын ажиллагаа үргэлжилж байгаа бөгөөд байцаалтын дараа эмэгтэй амиа хорлосон уу, бусдын гарт амиа алдсан уу гэдэг нь тодорхой болох юм байна.
Б.Золбоо
Сэтгэгдэл (6)