Оюутолгойн гэрээ Монголд ашиггүй болсон, өөрчлөх хэрэгтэй гэж зарим мэргэжилтэн, УИХ-ын гишүүд олон жил ярьсаар ирсэн. Гэвч улс төрийн улиг яриа мэт болсон байсан энэ гэрээний тухай анх удаа энэ долоо хоногийн төгсгөлд төрийн гурван өндөрлөг, УИХ-ын гишүүд цуглаж нээлттэй ярилаа. Энэ яриаг нэгэнт эхлүүлсэн тул монголчууд өөрсдийнхөө эрх ашгийг Оюутолгойн гэрээнд хамгаална гэсэн итгэл бий болоод байна. Улс төрийн үйл явдал дүүрэн өрнөсөн өнгөрч буй долоо хоногт ямар онцлох үйл явдал болсныг хүргэе.

Онцлох хүн: Энэ долоо хоногийн онцлох хүнээр шүүх хурал нь удаан үргэлжилсэн АМГ-ын дарга Ц.Батхуягийг нэрлэж байна. Өмнөх Засгийн газарт ажиллаж байсан олон хүнийг цагдаагийн байгууллага шалгаж байгаагийн хамгийн удаан үргэлжилсэн нь хууль бусаар лиценз наймаалсан гэх хэрэгтэй Ц.Батхуяг. Түүний хэрэгтэй холбоотойгоор АВстралийн иргэн, Саусгоби Сэндс компанийн хуулийн зөвлөх Сара Армсторнгийг АТГ-аас шалгаж байсан билээ. Гурван өдөр үргэлжилсэн шүүх хурлын эцэст Ц.Батхуяг 6.6 жилийн хорих ял, гурван жил төрийн албанд ажиллах эрхийг хаслаа. Энэ нь нэг талаараа төрийн мөнгийг дураараа идэж, завшвал төр төмөр нүүрээ харуулдгийн нэг жишээ болж байна.

Онцлох фото: МАН-ын Мэдээллийн технологийн хэлтсийн дарга, Бага хурлын гишүүн Б.Цогтгэрэл 24 хоног уулзаагүй охинтойгоо. Тэрбээр Орхон аймагт нэр дэвшсэн АН-ын гишүүнийг баяраа тэмдэглэж яваад нас барсан тухай худал мэдээлэл цацсан гэх хэргээр цагдан хоригдож байсан. Гэсэн ч түүний биеийн байдал энэ хугацаанд муудаж, бөөрний дутагдалд орж, өчигдөр батлан даалтанд гараад байна. Түүнийг Д.Арвин гишүүн “сэтгэл сайтай сайн залуу” гэж батлан даалтанд гаргаж авах тухай мэдээлэл гарсан ч МАН-аас эрс үгүйсгэсэн юм. Ямартаа ч удаан уулзаагүй аав, охин хоёр  хамт.

Онцлох эшлэл: “Оюутолгойн хөрөнгө оруулагчид Монголыг чадна гэж бодож байж магадгүй. Ингэж болохгүй гэдгийг өнөөдрөөс бид хэлэх ёстой”  Ерөнхийлөгч Ц.Элбэгдорж. УИХ-ын чуулганд оролцсон Ерөнхийлөгч Ц.Элбэгдорж монголчууд энэ гэрээний талаар нэг байр суурьтай байх ёстой гэсэн юм. Оюутолгойн гэрээний тухай байнга ярьдаг хэсэг гишүүд байхад энэ сэдвийг хөндөхөөр амаа үдүүлсэн мэт болдог хэсэг нь ч байна. Ямартаа ч Уул уурхайн сайд болон энэ гэрээг хариуцаж байгаа хүмүүсийг хамтад нь суулгаж байгаад Оюутолгойн гэрээнд чухам юу болоод байгаа  талаар монголчууд нэг ойлголттой болж чадлаа. Тэр нь Оюутолгойн гэрээ монголчуудад ашиггүй болсон, бид үүнийг өөрчлөх ёстой гэж.

Онцлох мэдэгдэл: УИХ-ын гишүүн С.Ганбаатар гишүүн МҮЭХ-ны ерөнхийлөгчийн албыг давхар хашдаг. Түүнийг энэ хоёр албыг давхар хашиж болхгүй гэж зарим хүн хэлж байсан ч тэрбээр МҮЭХ-ны гишүүд намайг боль гэсэн цагт энэ ажлаа өгнө гэж хариулж байв. Харин энэ долоо хоногт тэрбээр МҮЭХ-ны ерөнхийлөгчийн ажлаа өгөхөөр болжээ. Учир нь өмнө нь МҮЭХ-ны ерөнхийлөгч байсан нэгэн Үндсэн хуулийн цэцэд өргөдөл гаргаж түүнийг давхар ажил хийх ёсгүй гэжээ. Үндсэн хуулийн цэц ч С.Ганбаатар гишүүнийг ажлаа өгөх ёстой гэсэн байна. Тиймээс МҮЭХ удахгүй их хурлаа зарлаж энэ асуудлыг шийдэх аж. Сонирхолтой нь МҮЭХ-ны хуучин дарга нь тус байгууллагын мэдлийн байранд ресторан ажиллуулдаг бөгөөд түүнийгээ өгөхгүй гэж С.Ганбаатар гишүүнтэй зөрчилдсөн нь энэ гэнэ.