Нийтийн дууны “Морин хуур” наадам өнөө жил 26 дахь удаагаа зохион байгуулагдлаа. Энэ жил хөгжмийн зохиолчдын 80 гаруй бүтээл ирснээс 27 шилдэг бүтээл тунан үлдэж гала концертын дараа нэгдсэн дүнг гаргалаа.

Түрүү жил хөгжмийн зохиолч, “Морин хуур” наадмын гурван удаагийн шагналт Б.Бямбабаяр “Монголоо санасан сэтгэл” дуугаараа тэргүүн байр эзэлж байсан бол энэ жил төрийн соёрхолт, хөгжмийн зохиолч Б.Шарав “Аминаас үнэтэй газар шороо мину” дуугаараа хүртлээ. Гран-при шагналтан батламж, мөнгөн морин хуур цом, ивээн тэтгэгчийн шагнал гурван сая төгрөг гардлаа.

“Морин хуур” наадмыг гурван жилийн өмнөөс Монгол Улсын Ерөнхийлөгчийн ивээл дор зохион байгуулж эхэлсэн билээ.