УИХ-ын гишүүн С.Ганбаатар Оюутолгойн ордын гэрээ монголчуудад ашиггүй болсон гэдэг байр суурийг хатуу баримталж ирсэн билээ. Тэрбээр УИХ-ын гишүүн болохоосоо ч өмнө энэ гэрээний талаар ярьдаг байсан. Тэгвэл өнгөрсөн баасан гарагт Ерөнхийлөгч Ц.Элбэгдорж УИХ-ын чуулганд оролцож Оюутолгойн гэрээг шүүмжилж, "Монголчууд нэг ойлголттой байх ёстой" гэсэн билээ. Энэ гэрээг хийсэн Сангийн сайд С.Баярцогттой халз мэтгэлцэж байсан С.Ганбаатар өөрийнх нь байр суурийг Ерөнхийлөгч батлан дэмжсэнд тун баяртай байгаа аж. Тэрбээр Оюутолгойн гэрээ яагаад ашиггүй вэ гэдэг талаар 14 хоногт нэг удаа оюутан залууст лекц уншдаг юм. Олон жил ярьсан асуудал нь Ерөнхийлөгчийн хараанд өртсөнд С.Ганбаатар гишүүн урам оржээ.