Баярын өдрүүдэд осол, түймрийн 53 дуудлага иржээ. Нийслэлийн Онцгой байдлын газрын бие бүрэлдэхүүн баярын өдрүүд буюу энэ сарын 9-ний өдрийн 10:00 цагаас 13-ны өдрийн 10:00 цаг хүртэл албаны өндөржүүлсэн бэлэн байдлын зэрэгт шилжин ажиллалаа.

Мэдээлэл, шуурхай удирдлагын төвийн 101, 105 тусгай дугаарт өндөржүүлсэн бэлэн байдлын хугацаанд аюулт үзэгдэл, техникийн холбогдолтой осол, гал түймэртэй холбогдолтой нийт 53 дуудлага бүртгэгдсэн байна.

Ирсэн дуудлагыг ангилбал гал түймрийн 31, гал түймрийн зөрчлийн 12, хөрсний усанд автсан хоёр, цахилгаан шатанд хүн гацсан нэг, цогцос гаргах нэг, цасанд суусан хоёр, хаалга онгойлгох хоёр дуудлага тус тус ирсэн байна.

Нийслэлийн Онцгой байдлын газрын Аврах гал унтраах ангиуд ажиллан төр, аж ахуйн нэгж, байгууллага иргэдийн 102 сая төгрөгийн эд хөрөнгийг гал түймрийн аюулаас авран хамгаалжээ.

Өндөржүүлсэн бэлэн байдлын хугацаанд нийслэлийн Шуурхай мэдээллийн төвийн 310005 дугаарын утсанд иргэд, аж ахуйн нэгж, байгууллагаас нийт 69 санал гомдол ирснээс “Улаанбаатар цахилгаан түгээх сүлжээ”- 29, “Орон сууц нийтийн аж ахуй удирдах газарт”-22, “Орчны Бохирдол Хог Хаягдлын Менежментийн Хэлтэс”-5, Аж ахуйн нэгжтэй холбоотой-13 санал, гомдол ирснийг тухай бүр нь холбогдох албан тушаалтанд мэдээлж санал гомдлыг бүрэн шийдвэрлэж ажилласан байна.