Сакраменто хотын Монголчуудын холбоо Бурхан шашны “Занабазар” төвтэй хамтран "Тийн ялгуусан" хэмээх Усан могой жилийн сар шинийн баяраар ахмад настнуудад хүндэтгэл үзүүлж, Монголын цагаан сарыг Калифорни мужийн төрийн байгууллага, албаныханд сурталчлан таниулах арга хэмжээг хаврын тэргүүн сарын шинийн нэгний өдөр амжилттай зохион байгуулав.

    Энэхүү арга хэмжээнд тус хотод амьдарч буй ахмад настнууд, монгол иргэд, хүүхэд багачууд, мөн Ерөнхий консул Н.Анхбаяр, Калифорни мужийн Ассамблейн гишүүн, Ази номхон далайн нийгэмлэг, Сакраменто хотын боловсролын газар зэрэг орон нутгийн засаг захиргааны болон олон нийтийн байгууллагын төлөөлөл нийт 100 орчим хүн оролцлоо.

    Арга хэмжээний үеэр шашны ном хурж, морин хуурын аялгуу эгшиглүүлж, "Гэр" төвийн сурагчид монгол бүжиг бүжиглэж, монгол үндэсний хувцасны загварын шоу, мөн монгол эх орны талаарх бэсрэг үзэсгэлэнг толилуулснаас гадна Монгол Улсын гавьяат жүжигчин, дуучин С.Батсүх оролцож, ая дуугаа өргөсөн нь арга хэмжээнд оролцсон гадны төлөөлөгчдөд монгол эх орон, зан заншил, соёл урлагаа сурталчилсан томоохон үйл явдал болов. Зохион байгуулагчид ахмад настнуудад хүндэтгэл үзүүлж, алд цэнхэр хадаг, дурсгалын зүйл гардуулж, Ерөнхий консул Н.Анхбаяр монгол иргэд, хүүхэд багачуудын төлөө Сакраменто хот дахь Монголчуудын холбооноос хийж буй ажил,  эх орноо сурталчилан таниулах үйлсэд оруулж буй хувь нэмрийг нь үнэлж төрийн "Алтан гэрэгэ"-г тус холбоонд дурсгал болгон гардуулав.

    Түүнчлэн Бэй Ариа орчмын Монголчуудын холбооноос "Тийн ялгуусан" хэмээх Усан могой жилийн сар шинийн баярыг тохиолдуулан ахмад настнуудад хүндэтгэл үзүүлэх арга хэмжээг өнгөрсөн Ням гаригийн битүүний өдөр Ажаа гэгээний төв дээр зохион байгуулж шашны ном хуран,  сар шинийн үндэсний бөхийн барилдаан үзүүлж, хүүхэд багачуудын дунд зургийн уралдаан зохион байгуулж, зурсан зургаа ахмадуудад дурсган, урлагын бэсрэг тоглолт болов. Зохион байгуулагчид ахмад настануудад хүндэтгэл үзүүлж, алд цэнхэр хадаг, дурсгалын зүйлийн хамт бэлэглэлээ.