ОХУ дахь Монгол Улсын элчин сайдын мэдлийн байрыг түрээслүүлсэн, зарсан гэсэн мэдээлэл цацагдаад багагүй хугацаа өнгөрч байна. Энэ асуудал үнэн эсэхийг тодруулахаар УИХ-аас О.Баасанхүү гишүүнээр ахлуулсан ажлын хэсэг гарч, хоёрдугаар сарын 17-ны өдөр буюу маргааш Москваг зорихоор болсон талаар мэдээлсэн. Тэгвэл энэ талаар УИХ-ын гишүүн О.Баасанхүүгээс өөрөөс нь тодруулахад “Москва дахь Элчин сайдын яамны байрны түрээсийн мөнгө хаашаа орж хэрхэн зарцуулагдаж байгаатай холбогдуулан шалгалт хийх гэж байгаа. Түрээсэлж эхэлснээс нь хойшхи энэ хугацаанд түрээсийн мөнгө хэрхэн зарцуулагдаж байсан гэдэг нь сонин байна. Үүнийг мэдэхийн тулд газар дээр нь очиж байгаа нөхцөл байдалд шалгалт хийх гэж байна. Зөвхөн Москва дахь Элчин сайдын яам ч биш Герман улсад байгаа Монголын Элчин сайдын яам болон Тайваньд очно. Мөн Герман улсад байгаа Элчин сайдын яамны төсөвт нь шалгалт хийнэ. Ер нь манай улсаас гадаадад суугаа яамуудын хувьд төсөв мөнгөний асуудал их нууцлагдмал байдаг. Энэ ч үүднээс шалгалт хийж байна. Харин Тайвань улсаас манай улсад их хэмжээний мөнгөн хандив өгсөн ч энэ нь эзэддээ очоогүй гэсэн. Өөрөөр хэлбэл, манай улсын нэр нөлөө бүхий эрхмүүдийн нэг нь замаас нь өөрийн халаасандаа хийсэн талаархи мэдээлэл байна. Баталгаажуулан шалгаагүй байгаа учраас тэр эрхмийн нэрийг нь хэлмээргүй байна. Шалгалт хийсний дараа бүх зүйл тодорхой болно” гэлээ.
Сэтгэгдэл (12)