Талибууд хазара монгол гаралтай Пакистаны иргэдийг хоморголон хөнөөсөн хэрэг өчигдөр дахин гарлаа. Пакистаны зүүн хэсэгт оршдог Куетта хотын оршин суугчдын ихэнхи нь хазара үндэстэн бөгөөд байнга талибуудын халдлагад өртөж байдаг. Өнгөрсөн сард хотын зам дээр бөмбөг дэлбэлж 106 хазара иргэний амийг хөнөөсөн юм. Харин өчигдөр ийм хэрэг давтагдаж террористууд хүнсний зах дээр бөмбөг дэлбэлж 78 хүн амь насаа алджээ. Мөн хамгийн багадаа 180 хүн шархадсан бөгөөд халдлагад өртсөн хүмүүсийн тоо өсч магадгүй аж. Цагдаа нар бөмбөгийг усны машинд нуун хүнсний зах руу оруулж ирсэн гэж мэдэгдсэн байна. Мөн хоёр том үйлчилгээний төвийн барилга шатжээ. Дэлбэрэлтэнд өртөгсдийн олонхи нь хүнсээ цуглуулж явсан эмэгтэйчүүд, хүүхдүүд байсан аж. Энэ хэрэгт цагдаа нар "Lashker-e-Jhangvi" нэртэй эктеремист бүлэглэл хариуцлага хүлээх ёстой гэж үзэж байна. "Lashker-e-Jhangvi" бүлэглэл нь Исламын шашны нэг урсгалыг шүтдэг шийтүүдийг ёс бус гэж үзэн амийг нь хөнөөх ёстой гэж үздэг. Харин халдлагад удаа дараа өртөөд байгаа Куетта хотод хазара үндэстэн шийтүүдийн том нийгэмлэг байдаг юм.   
    Пакистанчууд, талибууд тэдэнд байнга занал хийлсээр ирсэн ч сүүлийн үед нууц ажиллагаа явуулж, хоморголон хядах нь олширч байгаа нь тэднийг айдаст автуулж байна. Өмнө нь олны танил, нэр хүнд бүхийн хазара хүмүүсийн аминд хүрдэг байсан бол одоо хүүхэд, эмэгтэйчүүдийг оролцуулан олноор нь хядах болсонд хотын иргэд санаа зовж байна. Энэ үйл явдалд Пакистын ерөнхийлөгч, ерөнхий сайд нар эмгэнэл илэрхийлсэн ч тэднийг хамгаалж чадахгүй байгаа аж.

  Өнгөрсөн сарын 10-нд болсон 100 гаруй хүн амиа алдсан дэлбэрэлтийн дараа хазарууд дөрвөн өдөр гудамжинд суун эмгэнэл зарлаж гашуудсан юм.