Интерполоор эрэн сурвалжлагдаж буй Т.Аятунгаа өөрийн хүүхдээ өнгөрсөн арваннэгдүгээр сарын 5-нд алдсан хэмээн мэдэгдээд буй. Тиймдээ ч "Би хохирогч. Тиймээс намайг Интерполоор эрэн сурвалжлагдах ёсгүй" хэмээн сэтгүүлчдэд мэдээлэл хийсэн юм. Харин уг мэдээллийг хийсний дараахан Гадаад харилцааны яамнаас өөр нэгэн тайлбар өгсөн. Тодруулбал, түүнийг өөрийн охинтой зүй бусаар харьцсан хэмээн Филиппиний шүүхээр шүүгдсэн гэсэн билээ. Түүний нөхөр Чарльз Эдвард түүнийг "Охинтойгоо зүй бус харьцсан. Амьд насанд нь аюул учруулахыг завдсан" хэмээн тус улсын хуулийн байгууллагад хандаж байжээ.
Тэгвэл Т.Аятунгаагийн талаар дахин нэг шинэ мэдээлэл олдлоо. Тодруулбал, түүний нөхөр
Чарльз Эдвард өөрийн фэйсбүүк хуудсандаа өнгөрсөн арваннэгдүгээр сарын 10-ны өдөр нэгэн баримт дэлгэсэн байв.
Уг мэдээлэлд тэрээр өөрийгөө хүүхдийн асран хамгаалах албан ёсны эрхтэй гэсэн бөгөөд Т.Аятунгааг хүүхэддээ хүч хэрэглэсэн талаар дэлгэжээ.
Т.Аятунгаагийн охин Тэргэлсарын эмнэлэгт хэвтэж буй зургийг нийтлээд "Т.Аятунгаад зодуулснаас хойш одоо хүртэл биеийн байдал нь хүндхэн байна” гэсэн тайлбар хийжээ.
Мөн хүүхдийн биеийн байдлын талаар өгүүлсэн Филиппин улсын Тагүй хотын эмнэлгийн оношилгооны бичгийг дэлгэн үзүүлсэн байна.
Хүүхэд асран хамгаалах эрхийг нь магадлан итгэмжилсэн тэрхүү гэрчилгээнд Чарльз Эдвардийг албан ёсны асран хамгаалагч хэмээн бичжээ. “Итгэмжлэлийг 2012 оны 11 сарын 6-ны өдөр гаргасан” хэмээн гэрчилгээний доод хэсэгт бичжээ. Харин Т.Аятунгаа хүүхдээ 2012 оны 11 сарын 5-нд алдсан хэмээн мэдээлээд байгаа юм.
Мөн Филиппин улсын бүс нутгийн шүүхийн шийдвэр болоод Интерполоор эрэн сурвалжлах зарын тухай өгүүлсэн бичиг баримтыг Чарльз Эдвард фэйсүүкдээ дэлгэн үзүүлсэн байна. Эдгээр мэдээллийн үнэн эсэх нь тодорхойгүй байгаа хэдий ч Гадаад харилцааны яам, Цагдаагийн ерөнхий газар, Хүний эрхийн үндэсний комисс зэрэг байгууллагаас энэ асуудалд болгоомжтой няхуур хандахыг сануулж байгаа юм.
Юутай ч охиноо нөхөртэй алдсан тусална уу хэмээн хэвлэлийнхэнд хандахдаа бүх мэдээллээ нууц байсан нь сэтгүүлчдийн эгдүүцлийг хүргэж байсан. Мөн нөхрийнхөө талаар ямар ч мэдээлэл өгөөгүй. Түүнчлэн нөхрийнхөө талаар ч мэдэхгүй байсан Т.Аятунгаагийн хэргийн талаар холбогдох байгууллагууд мэдээлэл өгөхөөс татгалзаад байгаа юм.
А.Гантуяа
Сэтгэгдэл (62)