“Оюу Толгой” компанид ажиллаж байсан С.Гантуяа Оюу Толгой компанийг Сүхбаатар дүүргийн Иргэний Шүүхэд өгсөн тухай мэдээллийг 11 сарын эхээр олон нийтэд хүргэж байсан. Гэтэл өнөөг хүртэл уг шүүх ажиллагааг Оюу Толгойн зүгээс таван удаа хойшлуулаад байгаа бөгөөд Шүүх хурал энэ сарын 27-ны лхагва гарагт болох юм байна.

-Таныг Оюутолгой компани мэдэгдэл өгч халсан нь таны төрсөн ах УИХ-ын гишүүн С.Ганбаатар Оюу толгойн хөрөнгө оруулалтын гэрээний талаар нээлттэй мэтгэлцээн болох гэж байсантай холбоотой байв уу?

-Шууд бол үгүй. Гэхдээ Оюу Толгой компани Гэрээгээр хүлээсэн үүргээ биелүүлээгүй мөн Монгол улсын болон Монгол улсын нэгдэн орсон Олон улсын конвенцийг биелүүлээгүйгээс үүдэн Монгол, гадаад ажилчдын цалингийн  тэнцвэртэй байдал их алдагдсан. Үүнээс үүдэн Оюу Толгой ХХК нь Монгол ажилчидтайгаа ёс зүйгүй, хүндлэлгүй харьцаж, айлган сүрдүүлгээс Монгол ажилчид хууль бусаар ажлаа хүлээлгэн өгч дарамт шахалтанд орж ирсэн жишээ нилээд байдаг. Тэдний нэг нь би болоод байна. 

-Танаас бусад хүмүүс шүүхэд хандаж байсан болов уу?

-Оюу Толгой компани үндсэн ажилтан 2000 гаруй Монгол ажилчид болон бусад гэрээт ажилтнуудын ажил мэргэжил, ур чадварыг шударгаар үнэлж, шударга цалин хөлс олгох ёстой. Гэтэл арьс өнгөөр ялгавралахаас ч дор Монгол нутаг дээр үйл ажиллагаа явуулж байж зөвхөн Монгол гэдгээр нь гадуурхаж байна. Энэ тухай ярьсан хүнийг нэг нэгээр нь халдаг тухай  яриа ч чих дэлсэж байсан. Тэгэхээр бодит амьдрал дээр энэ асуудал байгаа боловч ганцаарчлан шүүхэд хандаж үнэн шударгаар, Монгол улсын төрийн эрх бүхий хуулийн байгууллагаар шийдүүлэх гэж байгаа тохиолдол анхных нь гэж бодож байна.

-Шүүх ажиллагааг ямар шалтгаанаар таван удаа хойшлуулаад байгаа юм бол?

-Эхнийх нь Оюу Толгой компанийн итгэмжлэгдсэн төлөөлөгч нь хүндэтгэн үзэх шалтгаанаар гээд хурлыг хойшлуулах хүсэлт тавьсан гэсэн. Хоёр дахь нь өмгөөлөгч нь хэрэгтэйгээ танилцаж амжаагүй, гурав дахь нь мэдүүлэг өгөх гэрч нь гадаадад амарч байгаа /гадаад хүн/, дөрөв дэх нь өмгөөлөгч гадаад руу явсан, тав дахь нь шинээр авсан өмгөөлөгч нь хэрэгтэйгээ танилцаж амжаагүй гэсэн. Оюу Толгойн өмгөөлөгч, итгэмжлэгдсэн төлөөлөгч нь хөдөлмөрийн харилцааны асуудал, иргэний шүүхийн процедурыг сайн мэддэг, Монголдоо мэргэшсэн хуульч, их сургуулийн багш нар байгаа учраас шүүх хурал хойшлуулсан дээрх шалтгаанууд зүгээр л шалтаг гэж би бодож байна.

-Та өөрийнхөө заргыг авахдаа хэр итгэлтэй байна вэ?

-Энэ бол зөвхөн С.Гантуяа гэдэг хүний асуудал биш. Монгол улсын шүүх байгууллага, шүүгч, өмгөөлөгчиддөө би итгэж байна. Тэд Монгол улсын төлөө, Монгол иргэний төлөө тангараг өргөсөн байдаг тул энэхүү олон Монгол ажилчдыг хамарсан асуудлыг хуулийн дагуу үнэн зөв шийдвэрлэж өгнө гэдэгт найдаж байна.  2013 оны 2 дугаар сар 27-нд шүүх хурал болно. Монголын шүүхийг Оюутолгой ХХК хүндэтгэх байлгүй дээ.