Улс төрийн тогоонд МАН, МАХН нэгдэх, эвсэх эсэх асуудал хүчтэй яригдаж байгаа билээ. Нэг угшилтай нам тул хүчээ нэгтгэх нь зөв гэж дэмжигчид байхад түүнийг эсэргүүцэгчид бас олон байна. МАН, МАХН удахгүй болох Ерөнхийлөгчийн сонгуульд хамтарч оролцох эсэхээс Засгийн газар дахь эвслийн харьцаа ч өөрчлөгдөж болзошгүй байгаа тул олон нийт анхааралтай ажиглаж байна. Ямартаа ч энэ хоёр намын нэгдлийг хэн дэмжиж, хэн эсэргүүцэж байгаа байр суурийг онцлон хүргэе.

МАН-ын дарга Ө.Энхтүвшин: Хоёр намын эв нэгдлийг хангахад татгалзах шалтгаан алга. Гол нь дан ганц МАН-аас хамаарах асуудал биш учраас МАХН-ын удирдлага, мөн гишүүдтэй ярилцаж уриалгаа хүргүүлэх ёстой. МАХН-ын зүгээс хүлээн зөвшөөрвөл МАН-ын төвшинд татгалзах шалтгаан байхгүй “Миний хувьд хоёр нам нэгдэх асуудлыг дэмжиж байгаа. Тиймээс ч бид МАХН-ы удирдлагуудтай удаа дараа уулзалт зохион байгуулсан.Миний хувьд хоёр нам нэгдэж, ерөнхийлөгчийн сонгуульд өрсөлдөх ёстой гэж үзэж байгаа.

УИХ-ын гишүүн З.Баянсэлэнгэ: МАН-ын ахмад гишүүдийн хувьд хоёр намын угшил нэг гэдгээрээ нэгдэж нийлэхэд ойрхон санагдаж байх шиг байгаа юм. Гэхдээ тийм амар нэгдэж нийлчихгүй болов уу. Тодорхой цаг хугацаа шаардаж таарна. Гэхдээ МАХН-ынхан МАН-ынхнаас нэг л зүйлийг хүсч байгаа. Тэр нь улстөрийн хэлмэгдүүлтийг зогсооход өөрсдийн дуу хоолойгоо өргөөч гэж...

УИХ-ын гишүүн Ц.Нямдорж: МАХН бол өнөө маргаашгүй ширгэх гэж байгаа шалбааг. МАН бол том урсгал. Том урсгал шалбаагт очиж нийлдэггүй юм.

УИХ-ын гишүүн асан Э.Мөнх-Очир: Их хурлаа хийгээд даргаа сольсноор шинэчлэл болохгүй. Эргээд МАХН-тай нэгдээд Н.Энхбаярыг даргаар тавих гээд байгаа юм уу. Битгий мөрөөдөцгөө. Тийм юм байхгүй.

УИХ-ын гишүүн асан Ц.Цэнгэл: Ядаж үзэд баримтлалын нь адилхан байгаа учраас нэг талдаа багтах нь хэн хэнд нь хэрэгтэй болов уу: Тэгээд ч манай хоёр намын хэн нэгэнд нь овоож оцойсно давуу тал алга. Ер нь нэг угшлын намууд шүү дээ. Үл ойлголцох байдлаар хэсэг бүлэг хүмүүс манай намын хуучин нэр дээр нам байгуулж, бүртгүүлээд явсан. Улс төрийн намуудын тухай хууль, бусад хуулиудыг зөрчөөд гараад ирсэн хүмүүс.

МАХН-ын Гүйцэтгэх товчооны гишүүн Г.Бямбасүрэн: “МАН-тай нэгдэх асуудал яригдаагүй. Харин хамтарч ажиллах тал дээр ярилцаж болох юм. Тиймээс нэгдэхгүй”

УИХ-ын гишүүн Д.Дэмбэрэл: УИХ-ын сонгуулийн өмнө бие биетэйгээ ойлголцохгүй байсан нь нам дотооддоо ажиллаж чадаагүйн илрэл байх. Үүнийг нуугаад яах юв. Цаашид нам нэгдэхэд зорилго, чиглэлэ нэг байгаа эсэхийг харж, удирдлагын түвшинд нэр цэвэр хүмүүсийг байлгах талаар хичээх ёстой.

УИХ-ын гишүүн Ц.Оюунбаатар: Ц.Шаравдоржийн гаргасан МАХН, МАН-ын нэгдүүлэх уриалгад олон чухал санаа байна лээ. Мэдээж зүүний үзэл санаатай улс төрийн намууд хамтарч ажиллах зайлшгүй шаардлагатай. Иргэдийнхээ дийлэнх олонхийг хамгаалах зүүний үзлийг дотор нь янз бүрээр ангилах шаардлага байхгүй. Гэхдээ удирдлагуудын зөрчил, олигархууд ичгүүр сонжуургүй төрийн өмч идэж байгаа асуудлаас болоод хагарсан. МАН дотроо байгаа олигарх, авлигачдаасаа салж чадах юм бол энэ намтай “Шударга ёс” эвсэл хамтарч ажиллахад бэлэн. Энэ талаар ярьж хамтран ажиллах ёстой. Гэхдээ өнөөдөр Ц.Шаравдоржийн хэлж байгаа шиг шууд нэгдэнэ гэж байхгүй биз. Биенийгээ хүлээн зөвшөөрч чадахгүй зөрчилдсөн, намыг толгойлж байсан улстөрчдөд гол тээг байгаа. Хамтран ажиллах боломжийг судлах хэрэгтэй. Ерөнхийлөгчийн сонгуульд ч юм уу, дараагийн УИХ-ын сонгуульд хамтрах асуудлыг судлах хэрэгтэй. Нэгдэх гэдэг нь  холын асуудал, одоогоор ямарч боломж алга. МАН авлигачид, олигархуудаасаа салаагүй шүү дээ.

МҮАН-ын дарга М.Энхсайхан: Бид энэ үйл явдлыг хамгийн тайван, эрүүлээр харах болно. Нэг түүхэй энэ хоёр нам нэгдэнэ гэдэг МАН, МАХН-ын ахмадуудын хүсэл. Гэхдээ энэ алхам руу явах уу гэдгээс манай намын асуудал гарах тул шийдвэрийг хүлээж, их хурлаа зарлаж чадахгүй байна. МАН, МАХН нэгдэх эсэхийг харзнаж байна.