Монголын үйлдвэрчний эвлэлийг С.Ганбаатар удирдаж эхэлснээс хойш Монголын хөдөлмөр эрхлэгчид өмгөөлж хамгаалах эзэнтэй болсон. Тохиромжгүй томилгоотой дарга нарын дундаас хамгийн зөв хүнийг зөв газар нь аваачсан явдал энэ байлаа. Мэддэг ажлыг нь чаддаг хүнээр хийлгэвэл үр дүнд хүрдгийг харуулж яваа хүн бол С.Ганбаатар.

Гэтэл тэрбээр ойрмогхоноос МҮЭ-ийн ерөнхийлөгчийн ажлаа өгөх сурагтай. Өгөх ч гэж дээ. Хэн нэг нь ажлыг нь өгүүлэхээр зүтгээд байгаа юм даг уу даа. Ийн хэлэхийн учир нь Үндсэн хуулийн цэцэд Ши.Батбаярын хүү Бямбадорж хэмээх эрхэм гомдол гаргасан сурагтай. Үйлдвэрчний эвлэлийн байрны нэгээхэн хэсгийг эзэмшиж хувийн компанийнхаа үйл ажиллагааг явуулдаг Ши.Батбаярын хүү Бямбадоржоос МҮЭ-ийн байрыг буцаан авах гэснээс болж Бямбадоржийн уур хүрч, “МҮЭ-ийн холбоо нь төрийн бус байгууллага биш, түүний ерөнхийлөгч нь УИХ-ын гишүүнээр сонгогдсоноор ашиг сонирхолын зөрчилтэй болсон” хэмээн гомдоллосон байна. МҮЭ-ийн холбоо нь төрийн бус уу, төрийн үү гэдгийг нь ч яг таг тодорхойлсон тодорхойлолт байдаггүй юм билээ.

С.Ганбаатар нэг зарга хийвэл санасандаа хүч байж салдаг мөртлөө гүдэс зан гаргахаараа бас овоо нөхөр гэдгээ Оюутолгойн гэрээний асуудлаар С.Баярцогттой телевизийн халз мэтгэлцээнд орохдоо баталсан. Ямартаа л телевиз үзэгчид “Ганбаатар чинь харин Баярцогт шиг ардаа баг ажиллуулчихаад багтарч сандраад дэвхрээд байдаггүй овоо гүндүүгүй эр үү гүй юу” гэцгээж байхав. Үүгээрээ тэр нэр хүнд, өөрийн улаан нүүрээ хамгаалах башир арга хэзээд хэрэглэдэггүйгээ харуулсан болохоор энэ удаад ч холбооныхоо ерөнхийлөгчийн албанаас тас зуураад байхгүй байх л даа. Гэхдээ л түүнийг өнгөрсөн хугацаанд амжилттай хамтран ажиллаж, атгасан шагай шиг баг болж байсан хамт олон нь явуулах дургүй байгаа гэсэн. Тиймдээ ч холбооныхоо хүндэт ерөнхийлөгчөөр ч болтугай үлдээх юмсан гэж байгаа аж.

Дур зоргоор үнэ хөөрөгддөг байдлыг эсэргүүцэн тэмцдэг, төрийн албан хаагчдын цалин хөлс, тэтгэвэр тэтгэмж, хөдөлмөрийн хөлсний доод хэмжээг нэмэгдүүлэхийг шаарддаг,  шатахуун импортлогч “том толгойтнууд”  үгсэн хуйвалдаж бензиний үнээ нэмдэг бүдүүлэг дээрэнгүй явдлыг зогсоохын төлөө хоолойгоо хаттал хэл үг хийж тэмцдэгийн хүчинд болзошгүй олон дарамтнаас монголчууд ангижирсан. Хамгийн сүүлийн бас “зөв дөө, хүү минь” гэмээр нэг асуудлыг онцолъё. ШӨХТГ-ын байцаагч нь автобензин, дизель түлш импортлогч “том толгойтнуудыг” 17 тэрбум төгрөгөөр торгох шийдвэрийг цуцалж түмний эгдүүцлийг хүргэсэн. Завшсан этгээдүүд гэмгүй болж, үнийн дарамтад өртсөн иргэд дуугүй суух уу. Яг энд мөнөөх л С.Ганбаатар хэрэгтэй байсан. Тэр мөн л хэрэгтэй цагт эгдүүцэн тэмцсэн болохоор энэ хэрэг дарагдалгүй өнөөг хүртэл явж байгаа юм аа.

Монголын үйлдвэрчний эвлэл хэмээх байгууллагыг тэр удирдаж эхэлсэн цагаас хойш нурж унах шахсан байр нь овоо өнгө орж, хүн орохтойгоо болсон харагддаг.  Бас бусдад алдаж завшуулаад байсан байр сав, байгууламж, газар зэргийн ихэнхийг нь буцаан авсан гэсэн. Түүний бас нэг гавьяа бол хөлсний хөдөлмөр эрхлэгчдийн зоригийг багагүй өдөөж өгсөн явдал гэж хэлж болно. Аливаа шийдвэр, аливаа асуудал буруу байсан ч аялдан дагалддаг унтаа байдлыг сэрээж эрхээ хамгаалахаар зүтгэж тэмцвэл үр дүнг нь амсдагийг ойлгуулахад хувь нэмрээ оруулсан хүн.

Өөрийгөө рекламдах дуртай хүн болгон “Монголын ард түмэн” гэж цээжээ дэлддэг болсон энэ цаг үед “Монголын ард түмэн” гэж үнэнхүү сэтгэлээсээ хэлж чаддаг, тэдний төлөө ажил амьдралаа зориулж тэмцэж чаддаг хүн бол МҮЭ-ийн ерөнхийлөгч С.Ганбаатар. Ийм Ерөнхийлөгчөө алдахыг хүсэхгүй байх нь МҮЭХолбооныхны түмэн зөв биз ээ. Үйлдвэрчний эвлэл хэмээх байгууллагыг бусдын төлөөх, хөдөлмөрчин олны эрх ашгийн төлөөх гол үүргийг нь биелүүлж ажиллаж чадаж байсан энэ хүнийг явахаар Монголын ҮЭ-ийн холбооны гишүүд, нийт хөдөлмөрчин түмэн олигтойхон өмгөөлж хамгаалаад өгөх эзэнтэй болж чадах эсэх нь бүрхэг үлдэх боллоо. Гэхдээ түүний тэмцэгч чанарыг унтраах гэж байгаа биш дээ. Унтраая гэсэн ч бүтэхгүй биз ээ.