Маргааш буюу 3-р сарын 04-ний өдөр "Өрхийн эрүүл мэндийн төвийн хөгжил, тусламж үйлчилгээний шинэчлэл" улсын зөвлөгөөн болно. Зөвлөгөөн Засгийн газрын зарим сайд нар, эрүүл мэндийн яамны мэргэжилтнүүд, эмч нар зэрэг 250 хүн оролцох юм байна.

  2011-2012 онд өрхийн эрүүл мэндийн төвийн үйл ажиллагааг дэмжих чиглэлээр бодлогын шинж чанартай эрх зүйн бичиг баримтууд гарч, түүнийг хэрэгжүүлэх, өрхийн эрүүл мэндийн төвийн тусламж, үйлчилгээний чанарт ахиц гаргах, иргэдийн сэтгэл ханамжийг дээшлүүлэх явдал чухлаар тавигдаж байна. Иймд өрхийн эрүүл мэндийн төвийн тусламж үйлчилгээний чанар, хүртээмжийг сайжруулах чиглэлээр тулгамдаж байгаа асуудлыг хамтран шийдвэрлэж, өрхийн эрүүл мэндийн төвийн үйл ажиллагааг шинэчлэх зорилгоор шийдвэр гаргах түвшиний болон хэрэгжүүлэгч, гүйцэтгэгч байгууллагуудын хамтарсан зөвлөгөөн зохион байгуулж, тулгамдсан асуудлыг цаг алдалгүй шийдвэрлэх, өрхийн эрүүл мэндийн төвийг хөгжүүлэх шинэчлэлийн стратеги, бодлогыг батлах шаардлагатай байгаа аж.
 Зөвлөгөөний зорилго нь өрхийн эрүүл мэндийн төвийн тусламж, үйлчилгээний чанар, хүртээмжийг сайжруулан, иргэдийн сэтгэл ханамжийг дээшлүүлэхийн тулд өрхийн эрүүл мэндийн төвийн тулгамдсан асуудлыг хамтран шийдвэрлэж, хөгжлийн шинэчлэлийн стратеги, бодлогыг хэлэлцүүлэх юм. 
 
 Зөвлөгөөнөөс дараах үр дүнг хүлээж байна.
1. Өрхийн эрүүл мэндийн төвийн өнөөгийн байдал, тулгамдсан асуудлыг шийдвэрлэх арга замыг тодорхойлж, хөгжлийн шинэчлэлийн бодлого стратегийг боловсруулна.

2. Өрхийн ЭМТ-д үзүүлэх тусламж, үйлчилгээний багцыг хэлэлцүүлж батлана.
 
3. Өрхийн ЭМТ-тэй хийх гэрээний загвар, шалгуур үзүүлэлтийг хэлэлцүүлэн, гэрээлэгч талуудын хүлээх үүрэг хариуцлагыг өндөржүүлэх заалтуудыг нэмж тусган батлана.