Австралийн “Рио Тинто” компанийн давуу эрхийн хувьцаа эзэмшдэг “Turquoise Hill Resources” буюу хуучнаар “Айвенхоу Майнз” компанийн хувьцааны үнэ дэлхийн хөрөнгийн зах зээл дээр хурдацтайгаар унаад байна. Өмнөговь аймаг дахь Оюутолгойн ордын 66 хувийг эзэмшдэг “Turquoise Hill Resources” (TSX:TRQ)-ийн хувьцаа АНУ-ын Насдак хөрөнгийн бирж дээр өнгөрсөн баасан гараг буюу 3-р сарын 11-ний өдөр даруй 11 хувиар буурчээ. Өмнө нь тус компанийн хувьцаа ингэж ихээр унаж байгаагүй бөгөөд шалтгааныг нь Монголын Засгийн газэр Оюутолгойн ордыг ашиглах гэрээнд өөрчлөлт оруулах гэсэн оролдлого, хууль эрх зүйн тогтворгүй байдалтай холбон тайлбарлаж байна. Учир нь өнгөрсөн долоо хоногт Монголын тал “Рио Тинто” компанийн удирдлагуудтай уулзахдаа гэрээг өөрчилнө гэсэн хатуу байр суурьтай байсан. Энэ нь хөрөнгө оруулагч, хөрөнгийн зах зээлд оролцогчдыг түр харзнахад хүргээд байгаа гэж ажиглагчид дүгнэжээ. Мөн “Рио Тинто” компанийн ерөнхий захирал Сэм Валш өнгөрсөн сард “Оюутолгойн ордын үйл ажиллагаа эхлэх эсэх нь хоёр талын хэлэлцээрийн үр дүнгээс хамаарна” гэж мэдэгдсэн юм. Өөрөөр хэлбэл Монголын талын тавьсан шаардлага тэдэнд таалагдахгүй бол "Рио Тинто" Оюутолгой дахь үйл ажиллагаагаа зогсооно гэсэн. Учир нь "Рио Тинто" Bloomberg.com сайтад мэдээлснээр дэлхийн уул уурхайн салбарт гуравт бичигддэг "Рио Тинто" компани өнгөрсөн жил гурван тэрбум долларын алдагдал хүлээсэн байна. Тус компанийн хагас жилийнх нь орлого гэхэд 47 хувиар огцом буурчээ. Энэ нь 2009 онд болсон дэлхийн эдийн засгийн хямралын үеийнхээс ч илүү уналт аж. Тиймд хөрөнгө оруулагчид хоёр талын хэлэлцээрийн үр дүнг ажиглагч, тохиролцож чадах эсэхийг нь харж байгаа аж. Хэрвээ Монголын Засгийн газартай тохиролцож чадахгүйд хүрвэл Оюутолгойн олборлолтыг хойшлуулах эсвэл зогсоох магадлалтай гэсэн хүлээлт байгаа юм.
АНУ-ын Насдакийн хөрөнгийн бирж: Сүүлийн нэг сарын байдлаар.
АНУ-ын Насдакийн хөрөнгийн бирж: Сүүлийн нэг жилийн байдлаар.
Ийнхүү “Turquoise Hill Resources” (TSX:TRQ)-ийн хувьцаа 11 хувиар буурч, нэгж хувьцаа нь $7.05 доллараар үнэлэгдэх болсон нь түүхэндээ хамгийн их унасан тоо бөгөөд 2011 оны гуравдугаар сард энэ компанийн хувьцаа 28 доллараар арилжаалагдаж байсан юм.
Манай тал Оюутолгойн гэрээнд өөрчлөлт оруулна гэсэн хатуу байр хөрөнгө оруулагчдыг ийнхүү айлгаж орхижээ. “Оюутолгой” компанид олон алдаа дутагдал илэрсэн ч үүнийг нь засахын хажуугаар хөрөнгө оруулагчдаа тогтоон барих чухал үүрэг Засгийн газрын сайд нарт оногдож байх шиг.
Т.Гэрэл
Сэтгэгдэл (19)