ШУТИС-ийн хуучин удирдлагууд оюутны сургалтын төлбөр болох 60 тэрбум төгрөг, оюутны тэтгэлгийн 70 мянгыг арилжааны банкуудад байршуулан хүүлж, хэдэн зуун сая, тэрбумын ашиг унагадаг тухай мэдээлэл шуугиан тариад буй билээ. Өнөөдөр тус сургууль 36 мянган оюутантай.

ШУТИС-ийн хуучин удирдлагууд оюутнуудынхаа сургалтын төлбөр болох 60 тэрбум төгрөг болон оюутны тэтгэлгийн 70 мянган төгрөгийг арилжааны банкуудад хадгалуулан хүүлж, хэдэн зуун сая, тэрбумын ашгийг хууль бусаар олсон гэсэн мэдээлэл гараад байсан билээ. Тэгвэл өнөөдөр тус сургуулийн ректор байсан Б.Дамдинсүрэн энэ талаар хэвлэлийнхэнд мэдээлэл хийлээ.

Тэрээр ярихдаа "Бид нар жил бүр тайлан балансаа гаргаж, Удирдах зөвлөлөөрөө хэлэлцэн баталдаг. ШУТИС-ийн төсөв 60 тэрбум ч биш. Энэ бүх мөнгийг би зарцуулдаггүй. ШУТИС өөрөө 19 салбартай. Тэгэхээр мөнгийг 19 салбар нэгжийн төсвийн захирагч нарт хуваарилдаг. Тэр хүмүүс нэг, хоёрдугаар гарын үсгээ зураад зарцуулна. Миний мэдэж зарцуулж байсан хөрөнгө захиргааны нэгжийн л мөнгө байгаа.

Оюутны 70 мянга үе үе хэдэн сараар алга болоогүй. Харин хоёр удаа саатсан нь оюутны карт хэвлэх ажил удааширсантай холбоотой. Нарийн бүх тооцоо бий. Энэ мөнгө өгөгдөхгүй их уддаг. Сургалтын төрийн сан, ШУТИС-ийн 29 мянган оюутныг нэг хүн хариуцдаг. Хүн болгон данстай. Хүн болгоны овог нэр, данс, регистрийн дугаарыг нэг л хүн тулгадаг. Техникийн хувьд маш удаан. Манай салбар сургуулиудын нэгнийх нь нэр дуусаад өглөө гэхэд тэднийд өгсөн, манайд өгөөгүй гээд баахан хэл ам гаргадаг. Үүнээс болж сургуулийн удирдлага оюутны 70 мянгыг дансанд удаах сонирхолтой, хүү бодуулж авдаг гэж буруу ойлгоод байдаг. Манайх "Голомт", "Улаанбаатар" банктай харилцдаг. Бидэнд оюутны 70 мянгыг удаах сонирхол байгаагүй. Ташаа буруу мэдээдэл гарсан байна" гэсэн юм.

Тус сургууль нь 36 мянган оюутантай. Оюутан тус бүрийн сургалтын жилийн төлбөр дунджаар нэг сая 200 мянган төгрөг. Энэ мөнгө дээр оюутнууд анги сольсны, шилжиж ирсний төлбөр, кредитийн зөрүү гээд мөнгийг нэмж өгдөг. Ингэхээр тус сургуулийн нэг жилийн орлого 60 тэрбум төгрөгөөс хол давдаг хэмээн хүмүүс ярьж байгаа. Харин Б.Дамдинсүрэн үүнийг эрс үгүйсгэсэн юм.