Эрхэм хүндэт эмэгтэйчүүд, охид, бүсгүйчүүд, Монголын мянга мянган ээжүүддээ Хүн амын хөгжил, нийгмийн хамгааллын яамны зүгээс болон хувиасаа “Олон улсын эмэгтэйчүүдийн эрхийг хамгаалах өдөр”-ийн халуун  мэндийг чин сэтгэлээсээ дэвшүүлж байна.


УИХ-ын 2012 оны сонгуулийн үр дүнгээр байгуулагдсан Шинэчлэлийн Засгийн газраас Монгол хүний амьдралын чанарыг дээшлүүлж, хүн амын хөгжлийг хангах нийгмийн таатай орчныг бүрдүүлэхэд чиглэсэн нийгмийн цогц бодлого боловсруулж, хөгжүүлэхээр зорилго тавин ажиллаж байна.  Энэхүү зорилтын хүрээнд эмэгтэйчүүд, ээжүүдээ хандсан олон ажлыг Хүн амын хөгжил, нийгмийн хамгааллын яамны хамт олон  санаачлан хэрэгжүүлж байна. Тухайлбал  “Эмэгтэйчүүдийн хөгжлийн бодлого, шинэчлэл” үндэсний чуулганыг  2013 оны хоёрдугаар  сарын 27,28-ны өдрүүдэд  Орхон аймагт амжилттай зохион байгууллаа.

Чуулганаар гэр бүлийн тухай болон Гэр бүлийн хүчирхийллийн тухай хуулийн шинэчилсэн найруулгын төслийг боловсруулж УИХ-д өргөн барих, нийгэм, гэр бүлд  эмэгтэйчүүдийн гүйцэтгэх үүрэг, хариуцлага, оролцоог оновчтойгоор тодорхойлсон хөтөлбөр боловсруулах асуудлыг тусгах, жендерийн тэгш байдлыг хангах, эмэгтэйчүүдийн эрхийг хамгаалах, охид эмэгтэйчүүдийг хүчирхийллээс урьдчилан сэргийлэх, хүчирхийллийг таслан зогсоох чиглэлээр төрийн болон төрийн бус байгууллагуудын үүрэг хариуцлагыг нэмэгдүүлэх асуудлуудыг энэхүү чуулганаар нухацтай хэлэлцээд, олон шинэлэг ажил хийхээр төлөвлөснийг та бүхэндээ дуулгахад таатай байна.


Монголын эмэгтэйчүүд гэр бүл, нийгмийн амьдралд асар их үүргийг гүйцэтгэж байна. Эрт дээр үеэс Монголын сайхан  ээжүүдийн үр хүүхдээ төрүүлж өсгөн, улс эх орондоо хэрэгтэй хүн болгон сурган хүмүүжүүлэх, өрх гэрээ өөд татахад  үнэлж барашгүй үүрэг гүйцэтгэж ирсэн үндэсний уламжлалтай.Тийм ч учраас  мянга мянган сайхан ээжүүдийн   улс эх орныхоо төдийгүй гэр бүлийнхээ төлөө гэсэн чин сэтгэл, зүтгэлийг Монголын төр ямагт үнэлж, хүндэтгэн ирсэнийг тэмдэглэх нь зүйтэй.  Эх орны хөгжлийг даган  нийгэм, улс төрд  эмэгтэйчүүдийн гүйцэтгэх үүрэг өдрөөс өдөрт нэмэгдэж байна.

Ардчилсан сонгуулиар бүрэлдэн тогтсон одоогийн УИХ-д та бүхний итгэлийг хүлээн сонгогдсон 11 эмэгтэй гишүүн ажиллаж байна. Мөн Засгийн газрын бүрэлдэхүүнд хоёр эмэгтэй сайд эрчүүдтэй мөр зэрэгцэн ажиллаж байгаа нь үүний илрэл юм. Эмэгтэйчүүдийн  нийгмийн хариуцлага өдрөөс өдөрт өндөрсөж,  төр улсдаа  хариуцлагатай алба хашиж байгаад би хувьдаа таатай байна. Цаашдаа ч өрх гэрдээ төдийгүй улс эх орныхоо хөгжлийг тодорхойлох их үйлсэд эмэгтэйчүүдийн гүйцэтгэх үүрэг оролцоо улам батжин, нэмэгдэнэ гэдэгт итгэлтэй байна.
Айл гэрийнхээ гэрэл, гэгээ болсон эмэгтэйчүүд, эхчүүд та бүхэндээ хөгжил дэвшил сайн сайхан бүхнийг хүсэн ерөөе.


ХАХНХ-ын сайд      С.Эрдэнэ