Нийслэлийн захиргаанаас замын түгжрэлийг бууруулахын тулд авто машины дугаарын хязгаарлалтыг хэрэгжүүлж эхэлсэн билээ. Иргэд энэ шийдвэрийг дэмжиж, замын түгжрэл харьцангуй бага болсон. Тэгвэл иргэд дугаарын хязгаарлалтаас болж замын хөдөлгөөнд оролцоогүй өдрөө авто машины албан татвар болон бусад хураамжаас хасуулах санал гаргажээ. Тооцоолбол нэг жолооч жилийн 365 хоногийн 52 өдөрт нь машинаараа явахгүй байгаа аж. Тиймээс тээврийн хэрэгслийн үзлэгт орохдоо замын хөдөлгөөнд оролцоогүй өдрийнхөө төлбөрийг хасуулж авах санал гаргаад байгаа юм. Энэ саналыг ШӨХТГ-ын ажилтнууд анхааралдаа аваасай гэж мөн хүсчээ.