Ус, цаг уурын хүрээлэнгийн мэдээгээр хамгийн их хур тунадас өнгөрсөн хоёрдугаар сард Завхан аймгийн Улиастай суманд /10.0/ мм орсон байна. Энэ оны хоёрдугаар сард Өмнөговь аймгийн Ханбогд суманд хамгийн их температур 11.0 хэм, Завхан аймгийн Отгон суманд хамгийн бага температур -48.0 хэм байлаа. Салхины хурд хамгийн ихдээ Баян-Өлгий аймгийн Өлгий суманд 31 м/с хүрчээ.

Азотын давхар ислийн дундаж агууламж хоёрдугаар сард Улаанбаатар хотын 32-ын тойрог орчимд 25 удаа, 13-р хороолол орчимд 24 удаа, Хархорин захын орчимд 20 удаа, Офицеруудын ордон орчим 18 удаа, Баруун дөрвөн замын орчимд 11 удаа, 1-р хороолол орчимд 10 удаа, хүхэрлэг хийн хоногийн дундаж агууламж 13-р хороолол орчимд 26 удаа, 32-ын тойрог, Офицеруудын ордон орчимд тус бүр 25 удаа, Баруун дөрвөн замын орчимд 22 удаа, Хархорин захын орчимд 21 удаа, 1-р хороолол орчимд 20 удаа илэрчээ. Энэ нь агаарын бохирдол хэр их байгааг харуулж байгаа тоо баримт юм.  10 микроноос бага хэмжээтэй тоосны агууламж Баруун дөрвөн замын орчимд 26 удаа, 32-ын тойрог орчимд 24 удаа, 13-р хороолол орчимд 22 удаа, Хархорин захын орчимд 21 удаа 2.5 микроноос бага хэмжээтэй тоосны агууламж Баруун дөрвөн замын орчимд 26 удаа, агаарын чанарын стандарт дахь хүлцэх хэм хэмжээнээс давжээ.

Аюулт үзэгдэл, осол энэ оны эхний хоёр сард 1215 удаа гарсны улмаас 19 хүн амь насаа алдаж, 264 мал, 11 амьтан хорогджээ. Энэ оны эхний хоёр сард объектын түймэр 1180 удаа, мал, амьтны халдварт галзуу өвчин 12 удаа, 3.5 магнитудын газар хөдлөлт 11 удаа, гол нуурын усанд хүн унасан осол 3 удаа гарсан байна. Аюулт үзэгдэл, осолын улмаас 8.2 тэрбум төгрөгийн хохирол учирсан байна гэж Үндэсний статистикийн газраас мэдээллээ.