МАХН-ын удирдлагууд Ерөнхийлөгчийн сонгуульд хэнтэй хамтарч, хэрхэн оролцох вэ гэж толгойгоо гашилгаж байна. Бага чуулганаа хийсэн ч тоймтой үр дүнд хүрсэнгүй. Харин үүний оронд Ерөнхийлөгчийн сонгуульд нэр дэвших боломжтой хүмүүсийг нэрлэж баахан амбицлаад авсан. Үүнийг нь МАХН-ын энгийн гишүүд болон намын дарга Н.Энхбаярын гэргий хатуу шүүмжилжээ.

   МАХН-ын Гүйцэтгэх товчоо өнгөрсөн амралтын өдрөөр хуралдахад Хууль зүйн дэд сайд Э.Эрдэнэжамьяан огцрох өргөдлөө өгсөн нь олны анхаарлыг татаад байна. Хэл аманд өртөмтгий ч ажилдаа тэсч үлдээд байдаг Э.Эрдэнэжамьяан яагаад өөрөө өргөдлөө өгөх дээрээ тулсан бэ гэдэг сонирхол татаж байгаа  юм. Тэгвэл өмнөх генсек Н.Удвалтай харьцуулахад нам дотроо нэр хүнд муутай байдаг Г.Шийлэгдамба МАХН-аас Засгийн газарт ажиллаж байгаа сайд нараа “Намын даргаа хүнд нөхцөл байдалд байхад намын нэрээр өндөр албан тушаалд очсон эрхмүүд анхаарал тавихгүй байна” хэмээн зэмлэсэн байна. Үүнд эгдүүцсэн Э.Эрдэнэжамьяан сайдын суудлаас огцрох өргөдлөө өгчээ. Гэвч түүний өргөдлийг удирдлагууд нь хүлээн аваагүй аж.

    Г.Шийлэгдамбыг Засгийн газарт ажиллаж байгаа сайд нараа зэмлэсэн гэх мэдээлэлд олон хүн гайхаж байна. Ялангуяа намын дэд дарга, Шадар сайд Д.Тэрбишдагва, УИХ-ын дэд дарга Л.Цог, Эрүүл мэндийн сайд Н.Удвал нарыг дарамталсанд. Г.Шийлэгдамбын бяр нь амтагдаж, намынхаа дэд даргыг хүртэл зэмлэхэд хэн нөлөөлөв. Уг нь бол тэр ийм алхам хийж чадахгүй. Гэвч чадсан байна. Энэ мэдээж ард нь өөрийг нь хамгаалах хүнтэй болоод л тэр. Түүний ард хэн байна. Энэ асуултад ихэнх хүн Н.Энхбаярын эхнэр О.Цолмон хэмээн хардаж байгаа. Тийм  учраас л сайд нар Г.Шийлэгдамбад загнуулаад сууж.

    О.Цолмон ч өөрөө уг хуралд оролцсон. Тэрээр сайд нарт “Шударга үнэний төлөө тэмцэж явсан хүн хэлмэгдчихээд байхад та бүхэн юу ч хийсэнгүй. Та бүхнийг өдий зэрэгтэй болгосон хүн бол Н.Энхбаяр. Түүний бие маш хүнд байна. Оношийг нь зөв тодорхойлохгүйгээр эмчлэх бололцоо алга. Ийм хүнд үед та бүхэн гадаадад эмчлүүлэх арга тал бодолцож хөөцөлдөх ёстой. Бүр бүтдэггүй юм бол гадаадаас эмч авчирч үзүүлж, оношийг нь тодруулах чиглэлээр сэтгэл гаргах ёстой байсан” гэх хатуухан үгийг чулууджээ.
 
    Мөн тус хурлаар Эрүүл мэндийн сайд Н.Удвалыг огцруулах асуудлыг хэлэлцэх байсан ч хэлэлцээгүй хэмээн эх сурвалж мэдээлэв. Энэ бүхнээс харахад МАХН-ынхан дотроо зөрчилдөж эхэлжээ. Намынхаа даргад анхаарахын оронд өөрсдийгөө Ерөнхийлөгчийн сонгуульд нэр дэвшүүлнэ хэмээн шувуу нисгээд байгаа тус намынхны алхамыг иргэд шударга явдал уу хэмээн харж байна.