МАН-ын хэсэг залуус “Дахин сэргэлт”-ийн хөтөлбөр гээчийг санаачлан, намынхаа бодлого, үйл ажиллагаанд өөрчлөлт, шинэчлэл хийх шаардлагатай байна хэмээн  мэдэгдэж байсан. Тэднийг сонгуульд ялагдал хүлээсэн намын удирдлагаа шүүмжилдэг олныг жишгээр ийм үйлдэл гаргаж байна гэж харах хүмүүс олон байсан. Гэтэл зөвхөн намын залуус ч биш, намын удирдах албан тушаалтан нь намдаа шинэчлэл хэрэгтэй байна хэмээн дуугарч эхэлжээ. С.Бямбацогт гишүүн УИХ дахь МАН-ын бүлгийн дэд дарга, МАН-ын Удирдах зөвлөлийн гишүүн ч гэлээ намынхаа удирдлагуудыг сонгуулийн ялагдлын шокноосоо гарч чадахгүй, үл тоомсорлогдож байгаа гишүүдийнхээ төлөө юу ч хийхгүй байгаад харамсаж байгаа гэнэ. Уг нь тэрээр удирдлагаа шүүмжилж, шахамдуулахаас өмнө хүлээцтэй хандаж, ямар нэгэн дорвитой алхам хийнэ дээ гэсэн хүлээлттэй байжээ. Гэтэл түүний хүлээлтийг МАН-ын удирдлагууд хөсөрдүүлээд зогсохгүй бүр тэвчээрийг нь алдагдуулж орхив бололтой намынхаа өнөөгийн үйл ажиллагааг шүүмжилсэн томоохон ярилцлага өгчээ. Дарга нартаа долигонож, амжилт, алдар нэрд хүрдэг ерөнхий зарчимтай энэ намын удирдах албан тушаалтан нь хүртэл удирдлагаа шүүмжилж байгааг бодоход үнэхээр л тэвчээр алдарсан бололтой.