Хүн болж төрнө гэдэг зүүний үзүүрт будаа тогтохтой адил гэдэг бол ихэр заяа гэдэг түүнээс ч ховор тохиолдол. М.Сайханбилэг, М.Сайнбилэг хэмээх ихэр хүүгийн нэг нь хүнд өвчнөөр шаналж, түүнд хагалгаа хийлгэх мөнгө хэрэг болсон тухай хэвлэл мэдээллийн хэрэгслүүдээр цацагдаж байсан. Тэр ч бүү хэл Засгийн газрын хэрэг эрхлэх газрын дарга Ч.Сайханбилэг адилхан нэртэй М.Сайханбилэг хүүгийн эмчилгээний төлбөрт таван сая төгрөг хандивлаж, үүрэн холбооны операторуудад хүсэлт гаргаж, тусгай дугаар нээж өгч байсан. Түүнчлэн Сайханбилэг хүү монголын ард түмний халуун сэтгэлээр эмчилгээний зардал 60 сая төгрөгийг цуглуулж, Энэтхэг улсад эмчилгээ хийлгээд ирсэн. Цөсний төрөлхийн битүүрэлтэй хорвоод мэндэлж, хүнд хагалгаанд хоёр ч удаа ороод ээж аавтайгаа монголдоо ирээд байсан ч бие нь гэнэт муудаж хөөрхий хүү хорвоог орхижээ.
 Ар гэрийнхнийх нь хэлж буйгаар "Өчигдөр өглөө гэнэт бие нь муудаад шөнө нь хорвоог орхисон. Уг нь Энэтхэгт эмчилгээ хийлгээд бие нь овоо дээрдэж байсан. Ямар учраас зүрх нь гэнэт зогссоныг хэлж мэдэхгүй байна" гэлээ.