Насаараа мөнгө хураагаад ч байр худалдаж авч чадахгүй, бэл, бэнчин муутай бага, дунд орлоготой иргэд “100 мянган айлын орон сууц” төсөлд хамрагдах гэж хашаа, байшингаа зарсан нь одоо гудамжинд өлсгөлөн зарлахад хүргээд байна. Сонгуулийн өмнө улс төрчдийн бодож олдог чихэн дээр цэцэг ургуулсан энэ шоу нь өнөөдөр хөрсөн дээр буугаад олон хүнийг орон гэргүй болгох дээр туллаа. Мэдээж, үүний хариуцлагыг хэн үүрч, яаж хохиролгүй болгох вэ гэдэг гол асуудал. Иргэд Шинэчлэлийн Засгийн газар амласан зээлээ өгөхгүй байна хэмээн нэхэж байна. Засгийн газраас Төрийн банкны үйл ажиллагааг жигдрүүлж, зээлийн мөнгийг нь шийдэж өгөхгүй удаж байгаа нь үнэн. Гэтэл бас нэгэн үзүүштэй үзүүлбэр жагсаал болж буй талбай дээр өрнөлөө. Орон сууцны зээлийн хохирогч болсон иргэд дээр нэгэн “буянтан” санаа тавихаар ирсэн нь МАН-ын генсек Г.Занданшатар. Тэрбээр ярихдаа “Бид Засгийн газрыг энэ бодлогыг үргэлжлүүл эсвэл огцор гэсэн шаардлага л тавьж байна. Н.Алтанхуяг сайдыг Тэргүүн шадар сайд байхад энэ асуудал яригдаж байсан. Яагаад энэ ард түмэндээ зээлийг нь олгохгүй зогсоогоод байна вэ. Тиймээс бид энэ тэмцлийг дэмжиж байна” гээдэхэв. Угтаа бол “100 мянган айлын орон сууц” хөтөлбөр хэрэгжихгүй болсон нь МАН-ынханд хамгийн их хамаатай. Зургаан хувийн зээл ЗГ-аас биш МАН-аас болж гацсан гэдгийг улс төр гадарладаг хүн бүр санаж буй. Хэдийгээр ард түмэн цагаан цаас шиг гэж улс төрчид итгэдэг ч арай ч хэдхэн сарын өмнө болсон үйл явдлыг мартчихаар “бага тархитангууд” биш.

     Ч.Улаан МАН-ын сайдаас Сангийн яамны ажлаа хүлээж авахдаа л “улсын данс улайчихжээ” гэж халаглаж байсан. Дараахан нь Х.Тэмүүжин сайдын мэдэгдэлд Төрийн банкны ТУЗ-ын удирдлагууд өөрсдийгөө ямар ч шалтгаангүйгээр тус бүр 90 сая төгрөгөөр шагнасныг илрүүлсэн. Тэр өөрсдийгөө шагнасан нөхдүүд бол МАН-аас томилогдсон дарга нар. Төрийн сангийн санхүүжилтийг анх гаргахдаа Хятадын "Чалко" компанитай алдагдалтай муу гэрээ хийж, урьдчилгаа авч байсан үед МАН-ынхан засаг барилцаж байв. Тэд албан тушаалаасаа буусан болохоор одоо ямар ч падлийгүй болсон гэх үү?

    МАН-ынхан өөрсдийнх нь "гар хөл" эдгээр иргэдийг хохироож, өлсгөлөн зарлахад хүргэсэн гэдгийг мэдэхгүй байна гэж үгүй. Гагцхүү шоу хийх асуудлаа олж ядаад байгаа ч юм шиг. Яагаад 100 мянган айлын орон сууц хөтөлбөр зогсчихов оо? гэсэн асуултын хариуг МАН-ын сайд асан Д.Хаянхярваа л хэн хүнээс илүү мэдэж байх ёстой. Гэтэл Г.Занданшатар тэргүүтэй удирдах хүмүүс нь уучлал гуйх байтугай шинэ засаг буруутай гээд хэвлэлийн баатар болоод явж байх. Бидний буруу бий гээд ичдэггүй юм аа гэхэд чимээгүй сууж болдоггүй юм байх даа.